លោក កែវ រ៉េមី៖ សន្តិភាពធ្វើឱ្យពលរដ្ឋមានសិទ្ធិគ្រប់គ្រាន់ ឯប្រទេសមានការអភិវឌ្ឍលើគ្រប់វិស័យ
ពោធិ៍សាត់៖ កត្តាសុខសន្តិភាព ស្ថេរភាពនយោបាយរយៈពេល ២០ជាងមកនេះ ធ្វើឱ្យប្រជាពលរដ្ឋកម្ពុជា មានសិទ្ធិគ្រប់គ្រាន់ក្នុងការបញ្ចេញមតិ ប្រកបអាជីវកម្ម ដើម្បីបន្តអភិវឌ្ឍប្រទេសជាតិ និងការរស់នៅប្រកបដោយកិត្តិយស សេចក្តីថ្លៃថ្លូរ ដូច្នេះពលរដ្ឋទាំងអស់ត្រូវចូលរួមរក្សាសន្តិភាពនេះ ឱ្យបានយូរអង្វែង។ នេះជាការលើកឡើងរបស់លោក កែវ រ៉េមី ប្រធានគណៈកម្មាធិការសិទ្ធិមនុស្សកម្ពុជា នៅថ្ងៃទី១៨ ខែកក្កដា ឆ្នាំ២០១៩នេះ ។
ថ្លែងក្នុង ពិធីអញ្ជើញជាអធិបតីភាព ក្នុងពិធីបាឋកថា ស្តីពីរួមគ្នាថែរក្សាសន្តិភាព ដើម្បីលើកកម្ពស់សិទ្ធិមនុស្ស ដែលរៀបចំធ្វើឡើង ដោយរដ្ឋបាលខេត្តពោធិ៍សាត់ លោក កែវ រ៉េមី បានថ្លែងថា«កត្តាសុខសន្តិភាពបច្ចុប្បន្ននេះ មានសារៈសំខាន់ខ្លាំង ដូច្នេះប្រជាពលរដ្ឋទាំងអស់ត្រូវនាំគ្នាចូលរួមរក្សាសុខសន្តិភាព ស្ថិរភាពនយោបាយ និងការអភិវឌ្ឍលើគ្រប់វិស័យនេះដែលធ្វើឱ្យប្រជាពលរដ្ឋមានសិទ្ធិគ្រប់គ្រាន់ក្នុងការបញ្ចេញមតិ និងការស់នៅ»។
លោក កែវ រ៉េមី បានបន្តថា ប្រទេសជាតិមានសន្តិភាព ហើយពលរដ្ឋមានសិទ្ធិគ្រប់គ្រាន់ ក្នុងការរស់នៅដោយមានការទទួលស្គាល់ ពីសហគមន៍អឺរ៉ុប និងអង្គការសហប្រជាជាតិ រាល់ថ្ងៃនេះ គឺដោយសារការឈ្លៀសវៃនៃការដឹកនាំប្រទេស របស់សម្តេចតេជោ ហ៊ុន សែន នាយករដ្ឋមន្ដ្រីនៃកម្ពុជា។
លោកកែវ រ៉េមី បន្ថែមថា សម្ដេចតេជោ បានខិតខំតាំងពីប្រទេសជាតិ ស្ថិតនៅបាតដៃទទេរហូត ដល់មានការរីកចំរើនលើគ្រប់ផ្នែកគ្រប់វិស័យ ដែលធ្វើឱ្យពិភពលោកទទួលស្គាលការអភិវឌ្ឍន៍របស់ប្រទេសកម្ពុជា ហើយពលរដ្ឋមានសិទ្ធិពេញលេញ ក្នុងការរស់នៅការដើរហើរ ឬទេសចរណ៍ក្រៅស្រុកផងដែរ។
លោក ថា ការអភិវឌ្ឍន៍កសាងប្រទេស វាកើតចេញគណបក្សប្រជាជនកម្ពុជា ដែលរួមកម្លាំង និងសាមគ្គីគ្នា ទើបទទួលបានជោគជ័យ ក្និងការកសាងប្រទេស ទើបមានថ្ងៃនេះ ហើយធ្វើឱ្យប្រទេសមួយចំនួន ក្នុងពិភពលោកចងភ្ជាប់ធ្វើបណ្តាលសេដ្ឋកិច្ចផងដែរ៕
អត្ថបទ៖ សុខ លាភ
