ព្រះរាជទីនាំងថ្មីរបស់ព្រះមហាក្សត្រ មានពាសដែកយ៉ាងពិសេស
នាវេលាព្រឹកថ្ងៃទី ៩ ខែកក្កដា ឆ្នាំ២០១៩ ព្រះករុណាជាអម្ចាស់ជីវិតលើត្បូង ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត ព្រះអង្គសព្វព្រះរាជហឫទ័យស្ដេចយាងជាព្រះរាជាធិបតីភាពដ៏ខ្ពង់ខ្ពស់បំផុត ក្នុងព្រះរាជពិធីបុណ្យ « រុក្ខទិវា » ប្រារព្ធឡើងនៅភូមិស្រែត្រែង ឃុំក្បាលដំរី ស្រុកសំបូរ ខេត្តក្រចេះ។
គេសង្កេតឃើញថា ព្រះករុណាជាអម្ចាស់ជីវិតលើត្បូង បានគង់លើព្រះរាជទីនាំងថ្មី ជាម៉ូដែលរថយន្ត Range Rover ប្រភេទពិសេសមានពាសដោយដែកការពារសុវត្ថិភាពបានខ្ពស់បំផុត។ ព្រះរាជទីនាំងថ្មីនេះ មានរូបរាងដូចនឹងរថយន្ត Range Rover ផលិតឡើងពិសេសដោយក្រុមហ៊ុន KLASSEN។
Range Rover KLASSEN មានសមត្ថភាពការពារគ្រាប់កម្រិត ៧ និងកម្រិត ៩ មានតួខ្លួនជួរក្រោយវែងជាងប្រភេទធម្មតា, ដំបូលមានកម្ពស់ខ្ពស់ជាងមុន និងមានជម្រើសដូចជាដំបូលកញ្ចក់ថ្លាការពារគ្រាប់។ ផ្នែកខាងក្នុងមានខណ្ឌចែកដោយជញ្ជាំងមួយរវាងអ្នកធ្វើដំណើរ និងអ្នកបើកបរ ហើយមានប្រណីតភាពខ្លាំង ជាមួយប្រព័ន្ធទំនើបៗច្រើន។
ការពាសដែកលើរថយន្តនេះ អាចធន់នឹងគ្រាប់កាំភ្លើងបាញ់ទម្លុះ និងការបំផ្ទុះនៃគ្រាប់បែបដៃ DM51 បានផងដែរ។ ក្រៅពីមានសមត្ថភាពការពារពិសេស រូបរាងខាងក្រៅនៃរថយន្តប្រភេទនេះមិនខុសពី Range Rover Autobiography នោះឡើយ៕
កែសម្រួល៖ ស៊ាងម៉ី
ប្រភព៖ sabay
