សាលារៀនជាង១៥០កន្លែងនៅជប៉ុនត្រូវបិទទ្វារ ខណៈមនុស្សរាប់ម៉ឺននាក់ត្រូវជម្លៀសខ្លួនដោយសារគ្រោះទឹកជំនន់
បន្ទាប់មានភ្លៀងធ្លាក់មិនដាច់រយៈពេលប៉ុន្មានថ្ងៃមកនេះធើ្វតំបន់ភាគខាងត្បូងប្រទេសជប៉ុនបានរងការជនលេចយ៉ាងខ្លាំងដោយជំនន់ទឹកភ្លៀង។ យោងតាមទីភ្នាក់ងារព័ត៌មាន Kyodo បានឱ្យដឹងថា មនុស្សប្រហែល ៨៦៨,០០០ នាក់ ត្រូវបានអាជ្ញាធរពាក់ព័ន្ធណែនាំឲ្យភៀសខ្លួនភ្លាមៗ ចេញពីលំនៅឋានរបស់ពួកគេ ដើម្បីទៅរកទីមានសុវត្ថិភាពដោយសារតែរងនូវការគំរាមកំហែង ពីគ្រោះទឹកជំនន់ និងការបាក់ដី ។ តំបន់ដែលមានការជម្លៀសប្រជាពលរដ្ឋនោះ មានផ្ទះប្រមាណ៥៨ពាន់ខ្នង នឹងមានប្រជាជន រស់នៅជាង១,២៤លាននាក់ ។
ប្រភពដដែលបានឲ្យដឹងទៀតថា សម្រាប់គ្រោះធម្មជាតិដ៏អាក្រក់នេះក៏បានបង្ខំឲ្យសាលារៀនជាង ១៥០កន្លែងនៅក្នុងតំបន់ខាងលើធ្វើការបិទទ្វារ ដោយសារទឹកជំនន់ ការបាក់ដី និងភ្លៀងនៅតែបន្តកើតមាន ដែលធ្វើឲ្យប្រជាពលរដ្ឋជប៉ុនរងនូវទុក្ខលំបាកយ៉ាងខ្លាំង។
ហើយនៅក្នុងហេតុការណ៍ខាងលើនេះ ក៏បានបណ្ដាលឲ្យស្ត្រីម្នាក់បានបាត់បង់ជីវិត ដោយសារលំនៅឋានរបស់គាត់ នៅទីក្រុង Kagoshima ត្រូវបាក់ដីសង្កត់ពីលើ ខណៈគាត់ព្យាយាមរត់ចេញមិនទាន់ ៕
កែសម្រួល៖ ស៊ាងម៉ី
ប្រភព៖ Kyodo
