ក្រុមអ្នករកស៊ីក្នុងវិស័យសំណង់ត្រូវក្រសួងដែនដី កោះហៅមកប្រជុំនៅដើមខែនេះ
ភ្នំពេញ៖ ក្រសួងរៀបចំដែនដី នគរូបនីយកម្ម និងសំណង់ បានកោះហៅក្រុមអ្នករកស៊ីក្នុងវិស័យសំណង់ នៅក្នុងប្រទេសកម្ពុជាមកប្រជុំ និងពិភាក្សាការងារផ្សេងនៅដើមសប្តាហ៍នេះ បន្ទាប់ពីមានករណីបាក់ស្រុតអគារកំពស់ ៧ជាន់បណ្តាលឱ្យស្លាប់ និងរងរបួលពលរដ្ឋខ្មែរជាច្រើនកាលពីចុងខែកន្លងមកនេះ។ នេះបើយោងតាមសេចក្ដីប្រកាសរបស់ក្រសួងរៀបចំដែនដី នគរូបនីយកម្ម និងសំណង់ ចេញផ្សាយនៅថ្ងៃទី១ កក្កដានេះ ។
សេចក្ដីប្រកាសព័ត៌មានបានអោយដឹងថា សូមអញ្ជើញ លោកឧកញ៉ា លោកជំទាវ លោក លោកស្រី ប្រធានក្រុមហ៊ុនប្រកបអាជីវកម្មសាងសង់ ប្រធានក្រុមជាងសំណង់ ប្រធានក្រុមហ៊ុនប្រកបអាជីវកម្មសិក្សាគម្រោងប្លង់ និងរូបវ័ន្តបុគ្គលសិក្សាគម្រោងប្លង់មកចូលរួមបកិច្ចប្រជុំស្ដីពីការសិក្សាគម្រោងប្លង់ និងការសាងសង់អគារ នៅថ្ងៃទី ៤ ខែកក្កដា ឆ្នាំ២០១៩ខាងមុននេះ ក្រោមអធិបតីភាព លោកជា សុផារ៉ា ឧបនាយករដ្ឋមន្រ្តី រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់។
គួររំលឹកថាថ្មីៗ នេះរដ្ឋាភិបាលបានបង្កើត គណៈកម្មាធិការអន្ដរក្រសួងដឹកនាំដោយលោក ជាសុផារ៉ា ឧបនាយករដ្ឋមន្ត្រីរដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់ ដើម្បីពិនិត្យគុណភាពនៃអគារក្រោមដីនៅខេត្តព្រះសីហនុភាគនិរតី ក្រោយពីមានហេតុការណ៍រលំបាក់អគារ ៧ជាន់នៅខេត្តព្រះសីហនុផងដែរ៕
