ប្រសិនបើអ៊ីរ៉ង់ហ៊ានវាយប្រហារ សហរដ្ឋអាមេរិកនឹងតបទៅវិញយ៉ាងចាស់ដៃ

(អាមេរិក)៖ ប្រធានាធិបតីអាមេរិកលោក Donald Trump បានគំរាមនឹងសងសឹកទៅអ៊ីរ៉ង់ជាមួយនឹង «កងកម្លាំងដ៏ខ្លាំងក្លា និងអស្ចារ្យ» ប្រសិនបើមានការវាយប្រហារណាមួយដែលផ្ដើមដោយអ៊ីរ៉ង់។ លោក Trump បានសរសេរលើបណ្ដាញ Twitter កាលពីថ្ងៃអង្គារថា៖ «រាល់ការវាយប្រហារដោយអ៊ីរ៉ង់ទៅលើអ្វីក៏ដោយ អាមេរិកនឹងត្រូវប្រឈមទៅវិញជាមួយនឹងកងកម្លាំងដ៏ខ្លាំងក្លា និងអស្ចារ្យ។ ហើយនៅក្នុងតំបន់ខ្លះ ការបំផ្លិចបំផ្លាញនឹងមានន័យថា កំចាត់ចោលទាំងស្រុង»។

លោក Trump ក៏បានសរសេរផងដែរថា «សេចក្តីថ្លែងដែលល្ងង់ខ្លៅ និងប្រមាថមកអាមេរិកយ៉ាងខ្លាំងរបស់អ៊ីរ៉ង់ ដែលត្រូវបានដាក់ចេញនៅថ្ងៃនេះបង្ហាញថា ពួកគេមិនយល់ពីតថភាពពិតនោះទេ»។ ដែលនេះវាជាការសរសេរសំដៅទៅលើការរិះគន់របស់ប្រធានាធិបតីអ៊ីរ៉ង់លោក Hassan Rouhani ពីទណ្ឌកម្មថ្មីរបស់អាមេរិក ដែលបានដាក់ទៅលើមេដឹកនាំកំពូលលោក Ayatollah Ali Khamenei។ យ៉ាងណាមិញប្រធានាធិបតីអ៊ីរ៉ង់លោក Hassan Rouhani បានច្រានចោលការចរចាជាមួយរដ្ឋបាល Trump ដោយនិយាយថា សេតវិមានត្រូវបានរងគ្រោះដោយវិបត្តិជំងឺវិកលចរិក៕

កែសម្រួល៖ ស៊ាងម៉ី

ប្រភព៖ Tweeters