លោក ឌិន សុមេធារិទ្ធ ចង់អភិវឌ្ឍភូមិផ្កាត្រកួន ឲ្យក្លាយទៅជាភូមិបុរាណមួយដូចទៅនឹងសម័យលង្វែក
ថ្លែងប្រាប់សារព័ត៌មាន Fast News ស្ថាបនិករមណីយដ្ឋានភូមិផ្កាត្រកួន លោក ឌិន សុមេធារិទ្ធ បានឲ្យដឹងថា គម្រោងអភិវឌ្ឍន៍រមណីយដ្ឋាននេះ បានចាប់ផ្ដើមសាងសង់អស់រយៈរយៈពេលជាង១ឆ្នាំហើយ ដោយបានអភិវឌ្ឍក្នុងផ្ទៃដី ១០0ហិចតា។ លោក ចង់អភិវឌ្ឍភូមិផ្កាត្រកួននេះ ឲ្យក្លាយទៅជាភូមិបុរាណមួយដូចទៅនឹងសម័យលង្វែក ទើបភាគច្រើនផ្ទះ ដែលត្រូវសាងសង់នៅក្នុងភូមិនេះ គឺជាផ្ទះលំហែកាយបែបបុរាណខ្មែរ ដោយមិនមានការចម្លងម៉ូតពីប្រទេសជិតខាងឡើយ។
លោកថា ពលរដ្ឋរស់នៅទីក្រុងភាគច្រើនធ្លាប់រស់នៅផ្ទះថ្ម ឬវីឡាហើយ ដូចនេះហើយលោកចង់ឲ្យអតិថិជនផ្លាស់ប្តូរបរិយាកាស មករស់នៅផ្ទះឈើបុរាណវិញម្តង។ តែយ៉ាងមិញក៏មិនបានហាមឃាត់ដាច់ខាត មិនឲ្យសាងសង់ផ្ទះម៉ូតសម័យថ្មីនោះទេ គ្រាន់តែការសាងសង់ផ្ទះនោះ ត្រូវតែស្ថិតក្រោមការត្រួតពិនិត្យរបស់ក្រុមការងារលោកជាមុនសិន។
ចំណុចសំខាន់២របស់រមណីយដ្ឋានភូមិផ្កាត្រកួនគឺ ទី១ជាសួនកម្សាន្ដបែបធម្មជាតិដ៏ធំដោយមានបឹងធម្មជាតិ ទី២ ជាលំនៅដ្ឋានលំហែកាយ បែបបុរាណប្រកបដោយផាសុកភាពផងដែរ។ ស្ថាបត្យករ ឌិន សុមេធារិទ្ធ ប្តេជ្ញាថា នឹងធ្វើឲ្យរមណីយដ្ឋានផ្កាត្រកួននេះ ក្លាយជាជម្រើសដំបូង និងមានតែមួយគត់សម្រាប់អ្នកទីក្រុងមកកម្សាន្ដលេងជាលក្ខណៈក្រុមគ្រួសារ។
រមណីយដ្ឋានភូមិផ្កាត្រកួន មានទីតាំងស្ថិតនៅក្នុង ឃុំស្វាយប្រទាល ស្រុកស្អាង ខេត្តកណ្តាល។ បើយើងធ្វើដំណើរតាមផ្លូវជាតិលេខ ២១A ពីទួលក្រសាំងមក រមណីយដ្ឋាននេះ មានចំងាយប្រមាណ ២០គីឡូម៉ែត តែបើសិនជាធ្វើដំណើរតាមផ្លូវជាតិលេខ ២១ រមណីយដ្ឋាននេះមានចំងាយ ២៧គីឡូម៉ែត ដោយត្រូវវាងកោះអន្លុងចិន នឹងជិះកាត់តាមកោះក្របី។
គួរជម្រាបថា វិស័យទេសចរណ៍ គឺជាសរសរស្ដម្ភដ៏សំខាន់មួយ ដើម្បីទ្រទ្រង់ដល់កំណើនសេដ្ឋកិច្ចកម្ពុជា ខណៈដែលវិស័យនេះ ក៏ត្រូវបានរាជរដ្ឋាភិបាលចាត់ទុកថា គឺជាមាសបៃតង របស់កម្ពុជា និងកំពុងត្រូវបានជ្រោមជ្រែងយ៉ាងខ្លាំងផងដែរ។ ក្នុងនោះ ការបង្កើតនូវផលិតផលទេសចរណ៍ថ្មីៗដូចជា តំបន់កម្សាន្ដ កន្លែងសម្រាកលំហែកាយនានា ត្រូវបានរាជរដ្ឋាភិបាល ចាត់ទុកថា គឺជាអាទិភាពចម្បងមួយ ក្នុងការជំរុញដល់កំណើនទេសចរចូលមកកម្សាន្ដនៅកម្ពុជាកាន់តែច្រើនឡើង៕
អត្ថបទ៖ សុខ លាភ
