ជំងឺគ្រុនឈាមផ្ទុះឡើងគួរកត់សម្គាល់ ១ថ្ងៃមន្ទីរពេទ្យគន្ធបុប្ផា ទទួលកុមារគ្រុនឈាម ជិត៦០០នាក់
ភ្នំពេញ៖ ត្រឹមតែរយៈពេល១ថ្ងៃប៉ុណ្ណោះ មន្ទីរពេទ្យគន្ធបុប្ផាទាំង៥ទីតាំង បានទទួលកុមារមានជំងឺចំនួន៤,៣០៥នាក់ ត្រូវបានពិនិត្យនិងព្យាបាល ក្នុងនោះកុមារមានជំងឺគ្រុនឈាម មានចំនួនជិត៦០០នាក់ ។
តាមរយៈហ្វេសប៊ុករបស់មូលនិធិគន្ធបុប្ផាកម្ពុជា នៅថ្ងៃទី១៩ ខែមិថុនា ឆ្នាំ២០១៩ នេះ បានបង្ហោះ តួលេខរបស់មន្ទីរពេទ្យគន្ធបុប្ផាទាំង៥ទីតាំង ប្រចាំថ្ងៃទី១៧ ខែមិថុនា ឆ្នាំ២០១៩ នេះ បង្ហាញថា ៖ កុមារមានជំងឺចំនួន ៤,៣០៥ នាក់ ត្រូវបានពិនិត្យ និងព្យាបាលនៅក្នុងផ្នែកពិគ្រោះជំងឺក្រៅ និងកុមារមានជំងឺធ្ងន់ៗចំនួន ២៩៩០នាក់ កំពុងសម្រាកព្យាបាលនៅក្នុងមន្ទីរពេទ្យគន្ធបុប្ផា ។
ក្នុងចំណោមកុមារទាំងនោះ មាន ៥៧៧នាក់ ត្រូវបានរកឃើញថា មានជំងឺគ្រុនឈាមធ្ងន់ធ្ងរ កំពុងសម្រាកព្យាបាលនៅក្នុងមន្ទីរពេទ្យគន្ធបុប្ផា និង៨៩នាក់ ត្រូវបានវះកាត់ ។ ចំណុចដែលគួរកត់សម្គាល់ គឺការផ្ទុះឡើងនៃជំងឺគ្រុនឈាម។ ជាមួយនោះដែរមន្ទីពេទ្យ ប្រកាសឲ្យប្រុងប្រយ័ត្នខ្ពស់ពីការផ្ទុះនៃជំងឺគ្រុនឈាមគួរឱ្យកត់សម្គាល់ ។ ដូច្នេះ សូមអាណាព្យាបាលកុមារទាំងអស់មេត្តាប្រុងប្រយ័ត្ន និងចូលរួមទប់ស្កាត់ជំងឺគ្រុនឈាមតាមរយៈការការពារកុមារកុំឱ្យមូសខ្លាខាំ ៕
អត្ថបទ៖ សុខ លាភ
