ចិនបើកRANGE ROVER បុកម៉ូតូស្លាប់យុវជនពីរនាក់ភ្លាមៗនៅនឹងកន្លែង
យុវជនពីរនាក់ស្លាប់ភ្លាមៗនៅនឹងកន្លែង បន្ទាប់ពីជនជាតិចិនបើករថយន្តស៊េរីទំនើបមួយគ្រឿង បើកទៅបុកម៉ូតូជនរងគ្រោះដែលជិះយ៉ាងរន្ធត់។ ហេតុការណ៍នេះកើតឡើង នៅវេលាម៉ោង១០៖៣០នាទីយប់ថ្ងៃទី១៤ ខែមិថុនាឆ្នាំ២០១៩ ស្ថិតតាមបណ្ដោយផ្លូវ២០១១ចំណុចជិត សាលាមុំ ក្នុងសង្កាត់ក្រាំងធ្នង់ ខណ្ឌសែនសុខ។
ជនរងគ្រោះទី១ឈ្មោះយិន សំណាង ភេទប្រុសអាយុ២៤ឆ្នាំ មុខរបរជាងផ្សារដែក ស្នាក់នៅសង្កាត់ក្រាំងធ្នង់ខណ្ឌសែនសុខ, ទី២ឈ្មោះស្រេង ជាវ ភេទប្រុសអាយុ២៤ឆ្នាំ មុខរបជាងផ្សារដែក ស្នាក់នៅភូមិត្រពាំងថ្លឹងខណ្ឌពោធិ៍សែនជ័យ(ម្ចាស់ម៉ូតូ)។
ប្រភពពីកន្លែងកើតហេតុបានឲ្យដឹងថា មុនពេលកើតហេតុគេឃើញបុរសជាជនជាតិចិនពីរនាក់ បើករថយន្តទំនើបម៉ាក RANGE ROVER ពណ៌ខ្មៅ ស្លាកលេខភ្នំពេញ2R-0777 ទិសដៅពីលិចទៅកើតបោះពួយយ៉ាងលឿន ខណៈមកដល់ចំណុចកើតហេតុ បានវ៉ាជែងចូលមកខាងចំណីម៉ូតូបានបុកម៉ូតូឌ្រីមសង់ស៊េរី០១៩ពណ៌ខ្មៅ ស្លាកលេខ ភ្នំពេញ1HT-0788 ជិះដោយយុវជនពីរនាក់ក្នុងទិសដៅ បញ្ច្រាស់គ្នាពីកើតទៅលិចពេញទំហឹង បណ្ដាលឲ្យយុវជនពីរនាក់ស្លាប់នៅនិងកន្លែង រីឯខាងភាគីជនជាតិចិនត្រូវសមត្ថកិច្ចឃាត់ខ្លួននាំយកទៅប៉ុស្តិ៍ក្រាំងធ្នង់រងចាំប្រគល់ឲ្យសមត្ថកិច្ចជំនាញចរាចរណ៍។
ក្រោយពេលកើតហេតុ សមត្ថកិច្ចប្រគល់សាកសពជូនក្រុមគ្រួសារយកទៅធ្វើបុណ្យតាមប្រពៃណី ចំណែករថយន្ត និងម៉ូតូត្រូវសមត្ថកិច្ចយកទៅរក្សាទុករងចាំដោះស្រាយគ្នានៅពេលក្រោយ៕
អត្ថបទ៖ សុខ លាភ
