លោកមេធាវី សុខ សំអឿន គួពិនិត្យ និងវិសោធនកម្មច្បាប់ ពាក់ព័ន្ធនឹងការឃុំខ្លួនបណ្តោះអាសន្ន ឬ បង្កើតច្បាប់ពីការធានានៅក្រៅឃុំ
លោកមេធាវី សុខ សំអឿន ប្រធានក្រុមមេធាវីអមរិន្ទ បានសរសេរនៅក្នុងបណ្តាញសង្គមនៅថ្ងៃទី១៣ មិថុនានេះថា សព្វថ្ងៃសង្កេតឃើញថា ឲ្យតែមានបណ្តឹងព្រហ្មទណ្ឌ ហើយប្រសិនបើបញ្ជូនទៅស៊ើបសួរ ដឺងតែអយ្យការស្នើឲ្យឃុំខ្លួន ហើយចៅក្រមស៊ើបសួរ ក៏ត្រូវតែឃុំខ្លួនដោយសំអាងថាអយ្យការទេស្នើសុំ មិនមែនគាត់ចង់ឃុំទេ។
លោកថា បើតែអញ្ចឹង រាស្រ្តណាមិនខ្លាចចៅក្រម រាស្រ្តណាមិនញាក់សាច់ពេលដឹងថាចៅក្រមហៅខ្លួន។ គួរតែពិនិត្យមើលច្បាប់សិនទេដឹង? ក្នុងរដ្ឋដែលមានតុលាការមិនសូវគិតពីសេរីភាពរាស្រ្តអញ្ចឹង មានតែរំពឹងលើអង្គនិតិបញ្ញតិ្ត ដែលប្រមូលផ្តុំដោយតំណាងរបស់រាស្រ្តនោះទេ ដែលអាចពីនិត្យច្បាប់ និង កែ សសេរច្បាប់ឲ្យបានច្បាស់ដើម្បីជាទីពឹងរបស់រាស្រ្តផង។
លោកបន្តថា បើមានអ្នកគេចពីការចាប់ខ្លួន តើគេនឹងអាចរត់ពួននៅទីណាទៅ? ឬអាងថាគ្មានព្រៃពួនបាន? ជាអនុសាសន៍ គួតែពិនិត្យ និង វិសោធនកម្មច្បាប់ ពាក់ព័ន្ធនឹងការឃុំខ្លួនបណ្តោះអាសន្ន! ឬ បង្កើតច្បាប់ពីការធានានៅក្រៅឃុំ។ បង្កើតតុលាការឃុំខ្លួន Court de Liberté ដូចនៅបារាំង ក៏បាន! បើជ្រុលចំលងពីគេ ម៉េចមិនចម្លងទាំងស្រុង?៕
អត្ថបទ៖ សុខ លាភ
