លោក សម រង្ស៊ី ថា ប្រជារាស្ត្រខ្មែរយល់ព្រមនិងត្រៀមខ្លួន ចំពោះនៃការព្យួរប្រព័ន្ធអនុគ្រោះពន្ធ EBA
ប្រតិភូសហភាពអឺរ៉ុបបានធ្វើដំណើរទស្សនកិច្ចរបស់ខ្លួនកាលពីថ្ងៃទី៣ មិថុនា ក្នុងគោលបំណងស្វែងរកការពិតមួយ បន្ទាប់ពីប្រទេសនេះបានចាប់ផ្ដើមដំណើរការ ដែលនឹងឈានទៅដកហូតប្រព័ន្ធអនុគ្រោះពន្ធពីប្រទេសកម្ពុជា បើរកឃើញថា រដ្ឋាភិបាលដឹកនាំដោយលោកនាយករដ្ឋមន្ត្រី ហ៊ុន សែន ពុំបានស្ដារស្ថានភាពសិទ្ធិមនុស្ស និងលទ្ធិប្រជាធិបតេយ្យនៅកម្ពុជាឡើងវិញនោះ។
លោក សម រង្ស៊ី សរសេរនៅក្នុងទំព័រហ្វេសបុករបស់លោកនៅរាត្រីថ្ងៃទី៦ ឈានចូលថ្ងៃទី៧ ខែមិនថុនានេះថា ចំពោះលទ្ធភាពនៃការព្យួរប្រព័ន្ធអនុគ្រោះពន្ធ EBA ប្រជារាស្ត្រខ្មែរយល់ព្រមនិងត្រៀមខ្លួន ប្រឈមការលំបាកខ្លះថែមទៀតក្នុងរយៈពេលមួយដ៏ខ្លី ពីព្រោះយើងគិតពីអនាគតវែងឆ្ងាយ ហើយយល់ឃើញថា មានតែលទ្ធិប្រជាធិបតេយ្យទេ ដែលអាចធានាអនាគតមួយដ៏រុងរឿងសម្រាប់ខ្លួនយើងនិងកូនចៅយើង។
គួរបញ្ជាក់ផងដែរថា ប្រព័ន្ធអនុគ្រោះពន្ធ EBA ត្រូវបានផ្ដល់មកកម្ពុជាជាមួយលក្ខខណ្ឌនៃការគោរពសិទ្ធិមនុស្ស និងប្រជាធិបតេយ្យ ហើយតាមរយៈប្រព័ន្ធអនុគ្រោះពន្ធនេះ កម្ពុជានាំចូលទំនិញគ្រប់យ៉ាងចូលទៅទីផ្សារសហភាពអឺរ៉ុបដោយរួចផុតពីកាតព្វកិច្ចបង់ពន្ធគយ ដែលមានតម្លៃជិត ៧០០លានដុល្លារក្នុងមួយឆ្នាំ៕
អត្ថបទ៖ សុខ លាភ
