Honda មានពេល ៣ថ្ងៃបង្ហាត់ក្រុម U23 កម្ពុជាមុនប៉ះអូស្ត្រាលីស្អែកនេះ
បាល់ទាត់៖ បន្ទាប់ពីធ្វើដំណើរមកដល់ប្រទេសកម្ពុជា លោក Keisuke Honda អ្នកចាត់ការទូទៅក្រុមជម្រើសជាតិកម្ពុជា បានសម្រុកបង្ហាត់ក្រុមជម្រើសជាតិយុវជន U23 កម្ពុជាយ៉ាងយកចិត្តទុកដាក់ ពោលគឺលោកមានពេលត្រឹមតែ ៣ថ្ងៃប៉ុណ្ណោះក្នុងការដឹកនាំក្រុមគោព្រៃជំទង់ មុនបើកទ្វារពហុកីឡដ្ឋានជាតិទទួលក្រុមជម្រើសជាតិ U23 អូស្ត្រាលី បើកឆាកការប្រកួតជម្រុះពូល H នៃពានរង្វាន់ AFC U23 Championship 2020 នាថ្ងៃទី២២ ខែមីនា ឆ្នាំ២០១៩ស្អែកនេះ។
សមាជិកក្លឹបលីគកំពូលអូស្ត្រាលី Melbourne Victory រូបនេះ បានធ្វើដំណើរមកដល់កម្ពុជាតាំងពីព្រឹកថ្ងៃទី១៩ ហើយល្ងាចថ្ងៃដដែលលោកបានចាប់ផ្ដើមបង្ហាត់ក្រុមយុវជន U23 កម្ពុជាតែម្ដង ជាក់ស្ដែងកាលពីម្សិលមិញលោកបានដឹកនាំការហ្វឹកហាត់ រួមជាមួយលោក Felix ជាគ្រូបង្វឹកនៅលើទីលាន AUPP ដើម្បីពង្រឹងសមត្ថភាពកូនក្រុម ដើម្បីត្រៀមការប្រកួតផ្លូវការក្នុងពេលដ៏ខ្លីខាងមុខ មុនធ្វើការហ្វឹកហាត់ផ្លូវការនៅលើទីលានពហុកីឡដ្ឋានជាតិល្ងាចនេះ។ ជាមួយនឹងការមកដឹកនាំក្រុម U23 កម្ពុជាផ្ទាល់លើកនេះ Honda មិនត្រឹមតែចង់ជួយកម្ពុជាបានឡើងវគ្គបន្តនៃពាន AFC U23 Championship 2020 នោះទេ ពោលគឺអតីតកីឡាករជម្រើសជាតិជប៉ុនរូបនេះ ក៏មានមហិច្ឆតាចង់ជួយឲ្យកម្ពុជាមានឱកាស ក្នុងការស្វែងរកកៅអីចូលរួមព្រឹត្តិការណ៍កីឡាអូឡាំពិក នៅទីក្រុងតូក្យូប្រទេសជប៉ុន តាមរយៈការប្រកួតជម្រុះពានរង្វាន់យុវជន ប្រចាំទ្វីបអាស៊ីនេះផងដែរ។ នេះបើតាមការទម្លាយឲ្យដឹងពីមន្ត្រីសហព័ន្ធកីឡាបាល់ទាត់កម្ពុជា។
គួរបញ្ជាក់ថា ចំពោះការបប្រកួតជម្រុះពានរង្វាន់ AFC U23 Championship 2020 ប្រចាំពូល H ក្រុមគោព្រៃជំទង់កម្ពុជាស្ថិតក្នុងពូលជាមួយក្រុមខ្លាំងៗ ដូចជាត្រូវជួបក្រុម U23 អូស្ត្រាលីបើកឆាកនាថ្ងៃទី២២មីនា, ជួបក្រុម U23 កូរ៉េខាងត្បូងថ្ងៃទី២៤មីនា និងចុងក្រោយជួបក្រុមយុវជន U23 ឆាយនីសតៃប៉ិនាថ្ងៃទី២៦មីនា ឆ្នាំ២០១៩។ ចំពោះលោក Honda ក្រោយចប់បេសកកម្មដឹកនាំក្រុម 23 កម្ពុជា ១ថ្ងៃ ពោលគឺនៅថ្ងៃទី២៧ ខែមីនាគេនឹងត្រឡប់ទៅជួយក្លឹប Melbourne Victory វិញ៕
ប្រភព ៖ BTV
