វៀតណាម ប្រតិកម្មចំពោះនាយករដ្ឋមន្ត្រីសិង្ហបុរី ដែលថាវៀតណាមឈ្លានពានកម្ពុជា
ការលើកឡើងថាវៀតណាមឈ្លានពានកម្ពុជា ពីសំណាក់នាយករដ្ឋមន្ត្រីសិង្ហបុរី លី សៀនឡុង ធ្វើឲ្យទីក្រុងហាណូយខកចិត្ត យ៉ាងខ្លាំង ។ អ្នកនាំពាក្យ ក្រសួងការបរទេសវៀតណាមនៅថ្ងៃទី៤ ខែមិថុនា បានបង្ហាញការសោកស្ដាយ ចំពោះ ការលើកឡើងរបស់មេដឹកនាំសិង្ហបុរីដែល ធ្វើឡើងអំឡុងពេលកិច្ចសន្ទនា សន្តិសុខ Shangri-La និងនៅលើបណ្ដាញសង្គមហ្វេសប៊ុករបស់លោក ។ វៀតណាមចាត់ទុកសម្ដីលោកលីថា មិនបានឆ្លុះបញ្ចាំងការពិត ។
តាមរយៈ ទំព័រហ្វេសប៊ុករបស់ខ្លួននៅថ្ងៃទី៣១ ខែឧសភា នាយករដ្ឋមន្ត្រី សិង្ហ បុរី លោកលី សៀន ឡុង បានសរសេររំលែកមរណទុក្ខ និងបង្ហាញការ ស្ងើចសរសើរភាពជាអ្នកដឹកនាំរបស់លោកព្រេមទីន ស៊ូឡានុនដា អតីត នាយករដ្ឋមន្ត្រីថៃក្នុងទសវត្សរ៍១៩៨០ និងជាអតីតទីប្រឹក្សាផ្ទាល់របស់ ព្រះមហាក្សត្រថៃដែលទើបបានទទួលមរណភាព កាលពីថ្ងៃទី២៦ ខែឧសភា ។
ប៉ុន្តែលោកលី ក៏បាននិយាយព្រឹត្តការណ៍ប្រវត្តិសាស្ត្រ ដែលកើតឡើងនៅកម្ពុជា តែ ពាក់ព័ន្ធវៀតណាម« ក្នុងអំឡុងពេលដែលលោក ព្រេម ធ្វើជា នាយករដ្ឋមន្ត្រី ថៃ នោះវា ក៏ជា ពេលដែលសមាជិកអាស៊ានទាំង ៥ នៅពេលនោះបានប្រឆាំងនឹង ការឈ្លានពានរបស់វៀតណាម មកលើកម្ពុជា និងរដ្ឋាភិបាលកម្ពុជា ( ពេលនោះ ) ដែលមកជំនួសរបបខ្មែរក្រហម ។
ប្រទេសថៃបានប្រឈមនឹងកងទ័ពវៀតណាម នៅតាមបណ្តោយព្រំដែន របស់ខ្លួនជាមួយកម្ពុជា ។ លោកព្រេម បានសម្រេចចិត្តយ៉ាងមុតមាំដោយ មិន ទទួលយកអ្វីដែលកំពុងកើតឡើង នោះហើយបានធ្វើការជាមួយដៃគូក្នុង អាស៊ាន ដើម្បីប្រឆាំងវៀតណាមនៅតាមវេទិកាអន្តរជាតិនានា » ។
អ្នកស្រី Le Thi Thu hang អ្នកនាំពាក្យ ក្រសួងការបរទេសវៀតណាម បាន សរសេរលើបណ្ដាញសង្គមTwitter ថា ៖ « វៀតណាម មានសោកស្ដាយ ចំពោះការលើកឡើងរបស់នាយករដ្ឋមន្ត្រីសិង្ហបុរី លី សៀនឡុង នាកិច្ចប្រជុំ Shangri-La និងនៅលើហ្វេសប៊ុក ដែលមិនបានឆ្លុះបញ្ចាំងពី ការសច្ចភាព ប្រវត្តិសាស្ត្រ ហើយបង្កឲ្យមានផលប៉ះពាល់ អវិជ្ជមាន ក្នុងចំណោម សាធារណមតិ ។ »
អ្នកស្រីបន្តថា ក្នុងនាមជាសមាជិកសកម្ម និងមានការទទួលខុសត្រូវ របស់ អាស៊ានវៀតណាម បាននិងបន្តធ្វើការជាមួយ សមាជិក ដទៃទៀតដើម្បីកសាង សហគមន៍អាស៊ានដ៏រឹងមាំ ប្រកបដោយការរួបរួម និងសាមគ្គីភាព ហើយដើរតួនាទីស្នូលនៅក្នុងតំបន់ ។
ចំណែករដ្ឋមន្រ្តីក្រសួងការពារជាតិកម្ពុជាសម្តេច ទៀ បាញ់ ថ្លែងថា ក៏បានចោទរបស់រដ្ឋមន្រ្តីក្រសួងការពារជាតិនៃប្រទេសសិង្ហបូរីម្នាក់ ដែល ថ្លែងនៅក្នុងកិច្ចប្រជុំកំពូលសន្តិសុខអាស៊ីលើកទី១៨(The Shangri-La Dialogue) ថាគ្មានសច្ចៈធម៌ផងដែរ ដោយចោទប្រកាន់ថា វៀតណាមមកឈ្លានពានទឹកដីកម្ពុជា ខណៈការឈ្លានពានរបស់អាមេរិកមកទម្លាក់គ្រាប់បែករាប់លានគ្រាប់ បណ្តាលឲ្យប្រជាពលរដ្ឋខ្មែរស្លូតត្រង់បានស្លាប់រាប់សែននាក់ ហើយអ្វីបានជារដ្ឋមន្រ្តីរូបនេះមិនលើកយកមកនិយាយសូម្បីតែមួយម៉ាត់៕
អត្ថបទ៖ សុខ លាភ
