មន្ទីរប្រឆាំងគ្រឿងញៀន បង្ក្រាបស្ដ្រីមេក្លោងចែកចាយថ្នាំញៀនម្នាក់ ដកហូតបានថ្នាំជិត១គីឡូក្រាម នៅខណ្ឌដូនពេញ

(ភ្នំពេញ)៖ កម្លាំងជំនាញ (ក១០) នៃមន្ទីរប្រឆាំងគ្រឿងញៀន បានបើកប្រតិបត្តិការបង្ក្រាបស្ដ្រីជាមេក្លោងចែកចាយថ្នាំញៀនម្នាក់ ដកហូតបានថ្នាំប្រមាណជិត១គីឡូក្រាម នៅចំណុចខាងលិចផ្សារធំថ្មី ផ្លូវលេខ១២៨ កែងផ្លូវលេខ៦៧ សង្កាត់ផ្សារថ្មីទី១ ខណ្ឌដូនពេញ រាជធានីភ្នំពេញ។

របាយការណ៍របស់សមត្ថកិច្ច នៃមន្ទីរប្រឆាំងគ្រឿងញៀន បានបញ្ជាក់ថា ប្រតិបត្តិការបង្ក្រាបនេះ ធ្វើឡើងនៅថ្ងៃទី០៣ ខែមិថុនា ឆ្នាំ២០១៩ ក្រោមសម្របសម្រួលពី លោក ចែ សុង ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ។

សមត្ថកិច្ចបានបន្ថែមថា ​ក្រោយស្រាវជ្រាវយ៉ាងយកចិត្តទុកដាក់ ជាលទ្ធផលឃាត់ខ្លួនជនសង្ស័យម្នាក់ ឈ្មោះ ម៉ា ចាន់ធី ភេទស្រី មុខរបរសំអាងការ និងដកហូតបានសារធាតុញៀន ប្រភេទមេតំហ្វេតាមីន (ICE) ៩៩៩.៥៦ក្រាម និងទូរស័ព្ទដៃ១គ្រឿង។ បច្ចុប្បន្នជនសង្ស័យសមត្ថកិច្ចកំពុងរៀបចំសំណុំរឿង ដើម្បីបញ្ជូនទៅតុលាការចាត់ការបន្ដតាមនីតិវិធី៕