តោះទៅមើលតារា Chow Yun-Fat ឡើងភ្នំជាមួយតារាហុងកុងជាច្រើនដួង នៅថ្ងៃខួបកំណើតលោកទាំងអស់គ្នា

ហុងកុង៖ តារាមួយចំនួនជប់លៀងថ្ងៃខួបកំណើតដោយការហូបអីជុំគ្នា ប៉ុន្តែបែរជាតារាមុខស្រស់លោក Chow Yun-Fat ជប់លៀងថ្ងៃខួបកំណើតខុសគេទៅវិញ ដោយនាំមិត្តភក្តិរបស់លោកឡើងភ្នំជុំគ្នាកាលពីថ្ងៃទី១៨ ខែឧសភាកន្លងទៅនេះ។

ថ្មីៗនេះតារារូបនេះទើបតែជប់លៀងថ្ងៃខួបកំណើតដោយលោកមានអាយុ ៦៤ឆ្នាំ ហើយបាននាំមិត្តភក្កិរបស់លោកជាង ២០នាក់ឡើងភ្នំរួមគ្នា ក្នុងនោះមានទាំងតារាហុងកុងល្បីៗមួយចំនួន ដូចជា លោក Julian Cheung, អ្នកនាង Anita Yuen, អ្នកនាង Nina Paw, លោក Liu Kai Chi, លោក Kenny Wong, អ្នកនាង Catherine Chau និងតារាហុងកុងជាច្រើនដួងផ្សេងទៀត។

តាមប្រភពបានឱ្យដឹងថា លោក Chow Yun-Fat ព្រមទាំងតារាជាច្រើនដួងផ្សេងទៀតបានឡើងលើភ្នំអស់រយៈពេលជាង ៣ម៉ោង មុនពេលពួកលោកហូបអាហារថ្ងៃត្រង់ ដែលក្នុងនោះមានទាំងនំប៉ាវអាយុវែងសម្រាប់ឱ្យលោក Chow Yun-Fat ពិសាថែមទៀត។

ជាមួយគ្នានេះដែរ នៅក្បែរនំប៉ាវនេះបានសរសេរថា «រីករាយថ្ងៃកំណើតលោកបង Fat។ បងរត់កាន់តែច្រើន បងកាន់តែឆ្លាតនិងមានរូបរាងកាន់តែសង្ហា៕»