កម្ពុជា និង ចិន កំពុងធ្វើការចរចាអំពីលក្ខខណ្ឌតម្រូវមួយចំនួន សម្រាប់ការនាំចេញផលិតផលកសិកម្មផ្សេងទៀតក្រៅពីអង្ករ និងចេកអំបូង!
ក្រោយពីចំណងមិត្តភាពកម្ពុជា-ចិនបានឈានដល់ចំណុចកំពូលនិងបានក្លាយជាមិត្តភាពដែកថែប កម្ពុជាហាក់ផ្តោតកាន់តែខ្លាំងលើការនាំចេញផលិតផលរបសខ្លួនទៅកាន់ទីផ្សារប្រទេសចិន ជាក់ស្តែងនាំពេលបច្ចុប្បន្ននេះ កម្ពុជាកំពុងធ្វើការចរចាជាមួយនឹងមហាអំណាចចិន អំពីលក្ខខណ្ឌតម្រូវស្តីពីអនាម័យ និងភូតគាមអនាម័យ ដែលនឹងអាចឲ្យកម្ពុជាមានលទ្ធភាពក្នុងការនាំចេញនូវផលិតផលកសិកម្មផ្សេងទៀតៗក្រៅពីអង្ករ និងចេកអំបូង ដូចជា ស្វាយ ផ្លែមៀន ម្រេច ផ្លែស្រកានាគ ផ្លែដូង និងទឹកមាត់ត្រចៀកកាំ ជាដើម។
ជាមួយនឹងការរំពឹងទុកនូវទីផ្សារដ៏ធំរបស់ចិនក្នុងការនាំចេញនូវផលិតផលកសិកម្មកម្ពុជា ក្រុមហ៊ុនធំមួយមកពីប្រទេសចិន គឺ BGI International Investment បាននិងកំពុងរៀបចំដីជាង២ពាន់ហិកតា នៅខេត្តកំពង់ធំសម្រាប់ធ្វើការដាំដុះ កែច្នៃ និងវេចខ្ចប់ផលិតផលកសិកម្ម ដូចជាអង្ករ ស្វាយ និងស្វាយចន្ទី។
លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់និងនេសាទ នាឱកាសជួបជាមួយលោក He Jianping ប្រធានក្រុមប្រឹក្សាភិបាលនៃក្រុមហ៊ុន ជីប៊ីអាយ អិនធើណេសិនណល អិនវេសមិន ឯ.ក និងសហការី បានពិភាក្សាការងារដើម្បីជំរុញកិច្ចសហប្រតិបត្តិការក្នុងវិស័យកសិកម្មរវាងព្រះរាជាណាចក្រកម្ពុជា និងសាធារណរដ្ឋប្រជាមានិតចិនឱ្យកាន់តែល្អប្រសើរ និងមានភាពទូលំទូលាយថែមទៀតនាថ្ងៃទី ១៦ ខែឧសភា ម្សិលមិញនេះ។
នៅក្នុងជំនួបនោះផងដែរ លោក វេង សាខុនថា បានលើកឡើងថាចំណងមិត្តភាពយ៉ាងជិតស្និទ្ធរវាងកម្ពុជា និងចិនបាននាំមកនូវការអភិវឌ្ឍលើគ្រប់វិស័យសម្រាប់ប្រទេសកម្ពុជា ដោយភាគីចិនបានដើរតួយ៉ាងសំខាន់ក្នុងការជួយឧបត្ថម្ភគាំទ្រទាំងការផ្តល់ហិរញ្ញប្បទាន និងបច្ចេកទេសមកដល់កម្ពុជា ។ លោករដ្ឋមន្ត្រីក៏បានបន្ថែមទៀតថា មួយវិញទៀត ពាក់ព័ន្ធនឹងវិស័យកសិកម្ម ភាគីចិនក៏បាននិងបន្តផ្តល់កិច្ចសហប្រតិបត្តិការយ៉ាងល្អប្រសើរជាមួយភាគីកម្ពុជាផងដែរ ដោយភាគីចិនបានឯកភាពបង្កើនកូតានាំចូលអង្ករកម្ពុជារហូតដល់៤០០ពាន់តោន។
លោក វេងសាខុន បានបន្ថែមថា «ថ្មីៗនេះ ចិនក៏បានអនុញ្ញាតឱ្យចេកអំបូងលឿងកម្ពុជាធ្វើការនាំចេញឆ្ពោះត្រង់ទៅកាន់ទីផ្សារចិន ហើយសង្ឃឹមថាផលិតផលកសិកម្មមួយចំនួនទៀតដូចជាស្វាយ ផ្លែមៀន ម្រេច ផ្លែស្រកានាគ ផ្លែដូង និងទឹកមាត់ត្រចៀកកាំ ដែលភាគីទាំងពីរកំពុងធ្វើការចរចាអំពីលក្ខខណ្ឌតម្រូវស្តីពីអនាម័យ និងភូតគាមអនាម័យ នឹងអាចធ្វើការនាំចេញក្នុងពេលឆាប់ៗខាងមុខនេះ» ។
ទន្ទឹមនឹងនេះ ចំនួននៃការវិនិយោគពីក្រុមហ៊ុនចិនមកលើវិស័យកសិកម្មនៅកម្ពុជាក៏បាននិងកំពុងមានការកើនឡើងគួរឱ្យកត់សម្គាល់ផងដែរ ដូច្នេះលោក វេង សាខុន បានបង្ហាញនូវការគាំទ្រ និងស្វាគមន៍ចំពោះបំណងនិងផែនការវិនិយោគរបស់ក្រុមហ៊ុនមកលើវិស័យនេះ ដោយត្រូវសំដៅលើការកែច្នៃវេចខ្ចប់វត្ថុធាតុដើមដើម្បីផ្គត់ផ្គង់ទីផ្សារក្នុងស្រុក និងនាំចេញ។
ជាការឆ្លើយតប លោក He Jianping បានឲ្យដឹងថាជំនួបនាថ្ងៃម្សិលមិញជាមួយនឹងថ្នាក់ដឹកនាំក្រសួងកសិកម្ម គឺផ្តោតសំខាន់ទៅលើបំណង និងផែនការវិនិយោគរបស់ក្រុមហ៊ុនក្នុងការកែច្នៃ វេចខ្ចប់ ពិសេសការបំពេញខ្សែច្រវាក់ផលិតកម្មកសិកម្មពីចំណុចផ្តើម រហូតដល់ការនាំចេញតែម្តង ហើយអ្វីដែលសំខាន់នោះ ការធ្វើពាណិជ្ជកម្ម និងទីផ្សារកសិផលគឺតាមរយៈប្រព័ន្ធអ៊ីនធឺណេតដែលអាចកាត់បន្ថយពេលវេលា ការចំណាយ និងបង្កើនភាពទូលំទូលាយជូនគ្រប់ភាគីពាក់ព័ន្ធ។ លោកប្រធានក៏បានបញ្ជាក់ផងដែរថា ដើម្បីឱ្យផែនការវិនិយោគរបស់ក្រុមហ៊ុនទទួលបានជោគជ័យ ក្រុមហ៊ុនបានរៀបចំដីជាង០២ពាន់ហត នៅខេត្តកំពង់ធំសម្រាប់ធ្វើការដាំដុះ កែច្នៃ និងវេចខ្ចប់ផលិតផលកសិកម្ម ដូចជាអង្ករ ស្វាយ ស្វាយចន្ទីជាដើម ហើយគម្រោងនេះក៏ទទួលបានការសហការគាំទ្រពីក្រសួងកសិកម្ម និងកិច្ចការជនបទនៃសាធារណរដ្ឋប្រជាមានិតចិនផងដែរ៕
