Liverpool ទម្លាក់ Bayern Munich ឡើងវគ្គ៨ក្រុមចុងក្រោយ Champions League
នៅទីបំផុតក្រុមហង្សក្រហម Liverpool ធ្វើបានសម្រេចហើយក្នុងការឡើងទៅកាន់វគ្គ ៨ក្រុមចុងក្រោយនៃក្របខណ្ឌ UEFA Champions League រដូវកាលនេះ ក្រោយយកឈ្នះនៅដីអាល្លឺម៉ង់ Bayern Munich ជាមួយលទ្ធផល ៣–១ ជើងទី២។ កីឡាករខ្សែប្រយុទ្ធសេណេហ្គាល់ Sadio Mane បានក្លាយជាវីរបុរសនៃការប្រកួតនេះ បន្ទាប់ពីអាចស្វែងរកគ្រាប់ស៊ុតបញ្ចូលទីគូរប្រកួតបានដល់ទៅ ២គ្រាប់តែឯង ពោលគ្រាប់ទី១ នៅនាទីទី២៦ បានយ៉ាងល្អ បន្ទាប់ពីកំហុសខ្សែការពារហើយអ្នកចាំទី Manuel Neuer ឡើងផុតទី មុនពេលដែលម្ចាស់ផ្ទះ Bayern Munich សងវិញតាមស្មើដោយកំហុសខ្សែការពារ Joel Matip ធ្វើឲ្យចូលទីខ្លួនឯងធ្វើឲ្យទស្សនិកជនក្នុងកីឡដ្ឋាន Allianz Arena រីករាយជាខ្លាំង។ ប៉ុន្តែបេក្ខភាពជើងឯក ៥សម័យ Champions League មួយនេះធ្វើបានយ៉ាងល្អក្នុងវគ្គទី២ ក្នុងនោះកីឡាករខ្សែការពារថ្លៃជាងគេលើលោក Virgil van Dijk តែតមួយក្បាលបញ្ចូលទីបើកការនាំមុខជាថ្មី ២–១ ក្រោយលើកបាល់ចេញពីជ្រុងដោយប្រធានក្រុម James Milner ហើយអ្វីកាន់តែពិសេសនៅពេលដែល Mane ដដែលស៊ុតគ្រាប់ទី៣ នៃការប្រកួតនឹងជាគ្រាប់ទី២ របស់ខ្លួនក្រោយបញ្ជូនចេញពី Mohamed Salah។
តាមរយៈលទ្ធផលនេះក្រុមហង្សក្រហម Liverpool បានក្លាយជាក្រុមរបស់អង់គ្លេសទី៤ ដែលឈានចូលទៅវគ្គ ៨ក្រុមចុងក្រោយ ដែលរួមមាន Manchester United, Manchester City និង Tottenham Hotspur ផងដែរ។ ការចាប់ឆ្នោតចាប់គូរប្រកួតនៅជុំ ៨ក្រុមចុងក្រោយនឹងធ្វើឡើងនៅថ្ងៃសុក្រស្អែកនេះ ខណៈការប្រកួតជើងទី១ ធ្វើឡើងនៅថ្ងៃទី៩–១០ និងជើងទី២ ធ្វើឡើងថ្ងៃទី១៦–១៧ ខែមេសាខាងមុខនេះហើយ៕
