កសិករចិញ្ចឹមមាន់នៅខេត្តមណ្ឌលគិរី ប្តូរមកជ្រើសរើសពូជមាន់ចែ មកចិញ្ចឹមព្រោះមានហាងឆេងល្អ
មណ្ឌលគិរី៖ ផ្លាស់ប្ដូរការចិញ្ចឹមតាមបែបប្រពៃណី កសិករចិញ្ចឹមមាន់នៅភូមិពូព្រុំ សង្កាត់រមនា ក្រុងសែនមនោរម្យ ខេត្តមណ្ឌលគិរី បានប្តូរពូជមាន់ចែ ជាពូជមាន់ចិញ្ចឹមដែលមានហាងឆេងល្អ មានតម្រូវការខ្ពស់លើទីផ្សារជាងប្រភេទពូជមាន់គោកមាន់ ៣ សាសន៍ (ឬមាន់សាច់)។
លោក មាស ឌី កសិករចិញ្ចឹមមាន់ បានបង្ហើបប្រាប់ថា លោកបានទទួលបច្ចេកទេសបន្ថែមពីការចិញ្ចឹមមាន់ពីគម្រោងរេដបូកកែវសីមា តាំងពីការជ្រើសរើសពូជ និងបច្ចេកទេសនៃការចិញ្ចឹមដែលធ្វើឲ្យមាន់មានសុខភាពល្អធន់ជំងឺ។
លោក មាស ឌី បានជ្រើសរើសការចិញ្ចឹមពូជមាន់ចែជាងពូជមាន់ ៣ សាសន៍ (មាន់សាច់) ដោយអះអាងថា ពូជមាន់ចែមានការពេញនិយមច្រើន ហើយរសជាតិត្រូវចិត្តអ្នកទទួលទាន។
លោក មាស ឌី បានបញ្ជាក់បន្ថែមថា ខណៈពូជមាន់ចែមានតម្រូវការខ្ពស់លើទីផ្សារ ប៉ុន្តែតម្លៃអាចប្រែប្រួលតាមហាងឆេងជាក់ស្ដែង ដោយមួយគីឡូក្រាមបច្ចុប្បន្នលក់បានពី ១៧ ០០០ រៀល ទៅ ២០ ០០០ រៀល៕
