រដ្ឋមន្ត្រី ៣រូប បើកកិច្ចប្រជុំអន្តរក្រសួងលើកទី២ ស្ដីពីការអនុវត្តកម្មវិធីនយោបាយ និងសកម្មភាពដែលពាក់ព័ន្ធនឹងសហគមន៍កសិកម្មទំនើប សហគមន៍កសិករប្រើប្រាស់ទឹក និងភូមិគំរូ
ភ្នំពេញ៖ រដ្ឋមន្ត្រីក្រសួងចំនួន៣ នាថ្ងៃទី១៩ ខែកញ្ញា ឆ្នាំ២០២៤ នេះ បានរួមគ្នាដឹកនាំកិច្ចប្រជុំអន្តរក្រសួងលើកទី២ ស្ដីពីការសម្របសម្រួលការអនុវត្តកម្មវិធីនយោបាយ និងសកម្មភាពដែលពាក់ព័ន្ធនឹងសហគមន៍កសិកម្មទំនើប សហគមន៍កសិករប្រើប្រាស់ទឹក និងភូមិគំរូ ដើម្បីជំរុញឱ្យមានកិច្ចសហការជិតស្និទ្ធ បង្កើនប្រសិទ្ធភាព និងសហថាមពល សំដៅគាំទ្រដល់ការលើកកម្ពស់ និងកែលម្អជីវភាពសហគមន៍តាមមូលដ្ឋាន។
រដ្ឋមន្ត្រីទាំង៣នោះរួមមាន ៖ លោក ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងលោក ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ។
សូមបញ្ជាក់ផងដែរថា នៅកិច្ចប្រជុំអន្តរក្រសួងលើកទី១ បានប្រព្រឹត្តទៅកាលពីថ្ងៃទី៦ ខែឧសភា ឆ្នាំ២០២៤ ថ្នាក់ដឹកនាំ និងមន្ត្រីជំនាញនៃក្រសួងទាំងបី ហើយជាលទ្ធផលនៃកិច្ចប្រជុំបានចេញសេចក្ដីប្រកាសព័ត៌មានរួមគ្នាចំនួនបួនចំណុចគឺ៖
ទី១៖ កំណត់គោលដៅយុទ្ធសាស្ត្រជាអាទិភាពរបស់ក្រសួងទាំងបី ដោយដាក់កម្លាំងនិងធនធានរួមគ្នាដើម្បីសហការអនុវត្តឱ្យបានជោគជ័យ
ទី២៖ ប្រឹក្សាយោបល់ជាមួយគ្នាតាមជំនាញនិងវិស័យរៀងៗខ្លួនឱ្យបានទៀងទាត់និងជាប់លាប់ ដើម្បីបង្ការ និងទម្លុះនូវភាពរាំងស្ទះទាំងឡាយ ដើម្បីឈានទៅសម្រេចបាននូវគោលដៅដែលបានកំណត់
ទី៣៖ ផ្សារភ្ជាប់គម្រោងនិងកម្មវិធីនយោបាយដែលពាក់ព័ន្ធនឹងសហគមន៍កសិកម្មទំនើប សហគមន៍កសិករប្រើប្រាស់ទឹក និងភូមិគំរូ ធ្វើយ៉ាងណាជួយដល់ប្រជាពលរដ្ឋនៅតាមមូលដ្ឋានឱ្យទទួលបានអត្ថប្រយោជន៍ជាអតិបរមា
និងទី៤៖ ឯកភាពជាគោលការណ៍បង្កើតក្រុមការងារអន្តរក្រសួង ដើម្បីធ្វើការរួមគ្នាជាប់លាប់ និងដាក់ចេញនូវរបបប្រជុំទៀងទាត់រៀងរាល់បីខែម្ដង ដើម្បីតាមដានការងារដែលបានដាក់ចេញ និងកំណត់ផែនការអនុវត្តការងារបន្ត។
ដោយឡែកនៅកិច្ចប្រជុំអន្តរក្រសួងលើកទី២ គឺដើម្បីពិនិត្យ និងពិភាក្សា៖
ទី១៖ របាយការណ៍វឌ្ឍនភាពការងាររបស់ក្រុមការងារអន្តរក្រសួង និងរបាយការណ៍សង្ខេបលទ្ធផលកិច្ចប្រជុំលើកដំបូងនៃក្រុមការងារអន្តរក្រសួង
ទី២៖ ការរៀបចំបង្កើតលេខាធិការដ្ឋានសម្រាប់គាំទ្រដល់ដំណើរការក្រុមការងារអន្តរក្រសួង និងសេចក្តីព្រាងលក្ខខណ្ឌការងារ(ToR) របស់លេខាធិការដ្ឋាន
និងទី៣៖ លក្ខខណ្ឌវិនិច្ឆ័យរួម និងការកំណត់តំបន់គោលដៅអនុវត្តសកម្មភាពដែលមានលក្ខណៈសម្របសម្រួល សមាហរណកម្មគ្នា សំដៅជួយដល់សហគមន៍គោលដៅតាមមូលដ្ឋាន(MAC/FWUC/MV) ឱ្យទទួលបានអត្ថប្រយោជន៍ជាអតិបរិមា និងជំហានបន្ទាប់៕
