លន បញ្ញា ប៉ះ Elias ជាជើងឯកអឺរ៉ុបមានកំណត់ត្រាមិនធ្លាប់ចាញ់
ម្ចាស់មេដាយមាសកីឡាស៊ីហ្គេម លន បញ្ញា ត្រូវប៉ះជើងខ្លាំងលំដាប់អឺរ៉ុប Elias Naji នៅថ្ងៃទី២៧ ខែមិថុនា ឆ្នាំ២០២៤ នៅទីក្រុងបារីស ប្រទេសបារាំង នៅក្នុងព្រឹត្តិការណ៍ហ្គេនបឺតគុនខ្មែរស៊ុបើហ្វៃ« Ganzberg Kun Khmer Super Fight»។
បើមើលទៅប្រវត្តិរបស់កីឡាករ Elias NAJI ទើបអាយុ២០ឆ្នាំ និងធ្លាប់ឆ្លងកាត់ការប្រកួតបាន៣៥ដងគឺឈ្នះទាំងអស់ សូម្បីស្មើក៏មិនធ្លាប់ផង។ កីឡាករបារាំង-ម៉ារ៉ុករូបនេះមានខ្សែក្រវាត់ជាច្រើនគ្រឿងក្នុង៣ស្ថាប័នផ្សេងគ្នា ក្នុងនោះខ្សែក្រវាត់ថ្នាក់ជាតិបារាំងចំនួន៦ខ្សែ ខ្សែក្រវាត់ជាជើងឯកអឺរ៉ុប GMGP និងខ្សែក្រវាត់ WBC អឺរ៉ុប។
ចំណែក លន បញ្ញា ជាម្ចាស់ខ្សែក្រវាត់៥ខ្សែ ជាម្ចាស់មេដាយមាសកីឡាស៊ីហ្គេម ឆ្នាំ២០២៣ ជាម្ចាស់មេដាយប្រាក់ស៊ីហ្គេម ឆ្នាំ២០២១។ ក្នុងរយៈពេលជាង៣ឆ្នាំចុងក្រោយនេះ សម្រាប់ការឡើងប្រកួតគុនខ្មែរ រូបគេបានចាញ់តែម្តងគត់គឺចាញ់មិត្តរួមជាតិ ឡៅ ចិត្រា ខណៈការប្រកួតជាមួយដៃគូបរទេសមិនធ្លាប់ចាញ់សោះ។
កាលពីថ្ងៃទី២ ខែមិថុនា ឆ្នាំ២០២៤ លន បញ្ញា បានប្រកួតឈ្នះកីឡាករបារាំង Omar Bathily ដោយពិន្ទុ នៅប្រទេសបារាំង និងជាការឈ្នះលើកទី២លើដៃគូម្នាក់នេះ។
ស្ថាបនិកKun Khmer Super Fight លោក សឿ វណ្ណៈ បានសរសេរនៅលើទំព័រហ្វេសបុករបស់លោកនៅព្រឹកថ្ងៃទី០៧ ខែមិថុនា នេះថា កីឡាករ Elias NAJI ដៃគូ លន បញ្ញា ជើងខ្លាំងនៅតំបន់អ៊ឺរ៉ុបម្ចាស់ខ្សែក្រវ៉ាត់ប្រាំស្ថាប័ន ប្រកូត35ដងអត់ដែរចាញ់ អត់ដែរស្មើរ វ័យ20ឆ្នាំ បើបញ្ញាឈ្នះការប្រកួតនេះហ្នឹងមានការឧបត្ថម (ជំរាប់ជូនបើប្រអប់សារដល់ប៉ារីស)អរគុណ Ganzberg សហការណ៍ KSF។
