ស្នងការក្រុងភ្នំពេញ បញ្ជាឲ្យអធិការខណ្ឌទាំង១៤ សហការគ្នាបង្រ្កាបក្មេងទំនើងឲ្យមានប្រសិទ្ធភាព

(ភ្នំពេញ)៖ អគ្គស្នងការរង និងជាស្នងការនគរបាលរាជធានីភ្នំពេញ បានដាក់ចេញនូវបទបញ្ជាឲ្យលោកអធិការនគរបាលខណ្ឌទាំង១៤ ត្រូវសហការគ្នាឲ្យបានម៉ឺងម៉ាត់ដើម្បីបង្រ្កាបក្មេងទំនើងឱ្យមានប្រសិទ្ធខ្ពស់ ខណៈដែលក្នុងរយៈពេលចុងក្រោយនេះសកម្មភាពក្មេងទំនើងដេញវាយគ្នាតាមផ្លូវសាធារណៈហាក់បីដូចជាកម្រើកឡើងវិញបង្កឲ្យប៉ះពាល់សន្តិសុខសណ្តាប់ធ្នាប់សាធារណៈ។

ការចេញបទបញ្ជារនេះ ធ្វើឡើងក្នុងកិច្ចប្រជុំការពង្រឹងត្រូតពិនិត្យអនុវត្តវិធានការបង្ការទប់ស្កាត់ និងបង្រ្កាបក្មេងទំនើង នារសៀលថ្ងៃទី២២ ខែឧសភា ឆ្នាំ២០២៤ ។ លោកឧត្តមសេនីយ៍ឯក ជួន ណារិន្ទ បានជំរុញដល់លោកអធិការនគរបាលខណ្ឌទាំង១៤ និងការិយាល័យជំនាញ ត្រូវបង្កើនការគ្រប់គ្រងមុខសញ្ញាក្មេងទំនើង ទាំងមុខសញ្ញាចាស់និងមុខសញ្ញាថ្មីឲ្យបានច្បាស់លាស់ដើម្បីងាយស្រួលដល់សមត្ថកិច្ច ចាត់វិធានការបង្ការបង្រ្កាប ទាន់ពេលវេលា បើក្នុងករណីក្មេងទំនើងដែលសមត្ថកិច្ចយើងបានគ្រប់គ្រងមុខសញ្ញានោះរួចហើយ បើពួកគេធ្វើសកម្មភាពប្រព្រឹត្តបទល្មើសព្រហ្មទណ្ឌជាដើមនោះ។

ឧត្តមសេនីយ៍ឯក ជួន ណារិន្ទ ក៏ដាក់បទបញ្ជាឲ្យកម្លាំងការិយាល័យជំនាញនិងកម្លាំងអធិការដ្ឋាននគរបាលខណ្ឌទាំង១៤ត្រូវបង្រ្កាបក្រុមក្មេងទំនើងដែលបង្កើតជាក្រុមជាបក្ខជាពួកដាក់រហស្សនាមក្រុម ហើយដើរបង្កអុកឡុកតាមផ្លូវសាធារណៈ មិនតែប៉ុណ្ណោះពួកគេថែមទាំងប្រព្រឹត្តបទល្មើសបង្ករបួសស្នាមអ្នដទៃ ត្រូវតែបង្រ្កាបឲ្យអស់ដោយមិនអនុញ្ញាតឱ្យក្មេងទំនើងទាំងនោះបន្តធ្វើសកម្មភាពទៀតនោះទេ និងត្រូវយកចិត្តទុកដាក់ក្តាប់ព័ត៌មានសកម្មភាពក្មេងទំនើងឲ្យបានម៉ត់ចត់ដើម្បីយើងប្រើប្រាស់វិធានការបង្ការទប់ស្កាត់និងបង្រ្កាបក្មេងទំនើងឲ្យបានទាន់ពេលវេលា និងណែនាំឲ្យលោកអធិការនគរបាលខណ្ឌទាំង១៤ ត្រូវតែមានការទទួលខុសត្រូវម្ចាស់ការរាល់បទល្មើសក្មេងទំនើងកើតឡើងក្នុងមូលដ្ឋានរបស់ខ្លួន ក្នុងការស្រាវជ្រាវមុខសញ្ញាដើម្បីបង្រ្កាប៕