សភាពការណ៍កាន់តែធ្ងន់ធ្ងរនៅវេណេស៊ុយអេឡា
ថ្ងៃទី១៣ ខែមីនា ឆ្នាំ២០១៩ ម៉ោង 09:30 AM
(ដោយ៖ យឺន សីហា)
រដ្ឋមន្ត្រីការបរទេសអាមេរិក លោកMIKE POMPEO អះអាងតាមTWITTERនាថ្ងៃទី១២មីនាថា អាមេរិកនឹងដកបុគ្គលិកការទូតទាំងអស់ចេញពីវេណេស៊ុយអេឡា ខណៈពួកគេនៅមានវត្តមាននៅឡើយក្នុងស្ថានទូតរបស់ខ្លួនប្រចាំក្រុងការ៉ាកាស់ មកពីភាពធ្ងន់ធ្ងរនៃវិបត្តិក្នុងប្រទេសនោះ។
ចំណែកមេដឹកនាំប្រឆាំងវេណេស៊ុយអេឡា លោកJUAN GUAIDO អំពាវនាវឲ្យមានបាតុកម្មគ្រប់ទីកន្លែងក្នុងប្រទេស នាថ្ងៃទី១២មីនាជាថ្ងៃទី៥នៃការដាច់់ភ្លើងដ៏ធំ ធ្វើឲ្យប្រទេសជាប់គាំង ប្រឈមមុខនឹងការលំបាកនៃការខ្វះស្បៀងធ្ងន់ធ្ងរ។ ជាការឆ្លើយតបវិញប្រធានាធិបតីវេណេស៊ុយអេឡា លោកនីកូឡាស់ម៉ាឌូរ៉ូអំពាវនាវដល់ប្រជាជន ឲ្យក្រាញទប់ទល់យ៉ាងសកម្ម ប្រឆាំងការវាយប្រហារដែលលោកថា ធ្វើឡើងដោយសហរដ្ឋអាមេរិក ប្រឆាំងប្រព័ន្ធអគ្គិសនីរបស់ប្រទេស ដើម្បីរៀបចំអន្តរាគមន៍យោធាមួយ។
ដោយសំអាងពីសភាពការណ៍អាសន្នខាងស្បៀងនិងសុខាភិបាល ក្រោយការដាច់ភ្លើងជាង១០០ម៉ោងមកហើយ សភាប្រទេសនេះ ដែលគ្រប់គ្រងដោយពួកប្រឆាំង កាលពីថ្ងៃទី១១មីនា បានចេញការប្រកាសអាសន្នក្នុងប្រទេស តាមសំណើរបស់លោកGUAIDO។ សម្រាប់លោកម៉ាឌូរ៉ូយល់ថា ការវាយប្រហារប្រឆាំងប្រព័ន្ធអគ្គិសនី ជាការបិទបាំងបំណងអាមេរិក ដែលចង់ធ្វើឲ្យប្រជាជនមានការអស់សង្ឃឹម ប៉ុនប៉ងឲ្យជំនួយរបស់ខ្លួន បាននាំចូលក្នុងប្រទេសដោយកម្លាំង ព្រោះលោកបដិសេធជំនួយមនុស្សធម៌ទាំងនោះ ដែលលោកថាជាលេសសម្រាប់អន្តរាគមន៍យោធាអាមេរិក៕
