អតីតមេដឹកនាំមីយ៉ាន់ម៉ាលោកស្រី អ៊ុងសាន ស៊ូជី ត្រូវបានផ្លាស់ប្តូរពីការឃុំខ្លួននៅក្នុងពន្ធនាគារ ទៅឃុំខ្លួនក្នុងផ្ទះវិញហើយ ដោយសារតែអាកាសធាតុក្តៅខ្លាំងពេក

អ្នកនាំពាក្យរដ្ឋាភិបាលយោធាបានប្រាប់ប្រព័ន្ធផ្សព្វផ្សាយថា អតីតមេដឹកនាំមីយ៉ាន់ម៉ាលោកស្រី អ៊ុងសាន ស៊ូជី ត្រូវបានផ្លាស់ប្តូរពីការឃុំខ្លួននៅក្នុងពន្ធនាគារ ទៅឃុំខ្លួនក្នុងផ្ទះវិញហើយ ដោយសារតែអាកាសធាតុក្តៅខ្លាំងពេក ដែលគំរាមកំហែងដល់សុខភាពអ្នកទោសវ័យចំណាស់។ អ្នកនាំពាក្យរបបយោធាលោក Zaw Min Tunបាននិយាយថា «ចាប់តាំងពីអាកាសធាតុក្តៅខ្លាំង មិនត្រឹមតែសម្រាប់លោកស្រីអ៊ុងសាន ស៊ូជីប៉ុណ្ណោះទេ… សម្រាប់អ្នកទាំងអស់គ្នាដែលត្រូវការការប្រុងប្រយ័ត្នជាចាំបាច់ ជាពិសេសអ្នកទោសវ័យចំណាស់ យើងកំពុងធ្វើការដើម្បីការពារពួកគេពីជំងឺគ្រុនក្តៅ»។

សូមជម្រាបជូនថា លោកស្រីស៊ូជី អាយុ ៧៨ឆ្នាំ ត្រូវបានយោធាមីយ៉ាន់ម៉ាចាប់ឃុំខ្លួន តាំងពីបានផ្តួលរំលំរដ្ឋាភិបាលលោកស្រីក្នុងរដ្ឋប្រហារឆ្នាំ ២០២១។ លោកស្រីប្រឈមនឹងការជាប់ពន្ធនាគារ ២៧ ឆ្នាំពីបទឧក្រិដ្ឋ។ កាលពីខែកុម្ភៈកន្លងទៅ កូនប្រុសរបស់លោកស្រី ឈ្មោះ Kim Aris បាននិយាយថា លោកស្រីស៊ូជី ត្រូវបានគេឃុំខ្លួននៅបន្ទប់ឃុំឃាំងតែម្នាក់ឯង ហើយលោកស្រីមានស្មារតីល្អ បើទោះបីជាសុខភាពរបស់លោកស្រីមិនល្អដូចកាលពីមុនក៏ដោយ។

ជាមួយគ្នា អ្នកនាំពាក្យរបស់រដ្ឋាភិបាលស្រមោល NUG បានអំពាវនាវឱ្យមានការដោះលែងលោកស្រី ស៊ូជី និងលោក U Win Myint ប្រធានាធិបតីមីយ៉ាន់ម៉ា ដែលបានផ្លាស់ប្តូរទៅឃុំឃាំងក្នុងផ្ទះដែរនោះដោយគ្មានលក្ខខណ្ឌ។ ក្រៅពីលើនេះ មេដឹកនាំពិភពលោក និងសកម្មជនគាំទ្រលទ្ធិប្រជាធិបតេយ្យបានអំពាវនាវម្តងហើយម្តងទៀត ឱ្យមានការដោះលែងលោកស្រីស៊ូជី៕