TOWN បន្តចេញផ្សព្វផ្សាយគុនខ្មែរទៀតហើយដោយនាំកីឡាករ ម៉ឺន មេឃា ទៅចិនស្អែកនេះ
ភ្នំពេញ ៖ ទូរទស្សន៍ TOWN ម្សិលមិញនេះបានធ្វើសន្និសិទសារព័ត៌មានប្រកាសនាំកីឡាករជើងខ្លាំង ម៉ឺន មេឃា ទៅប្រកួតនៅប្រទេសចិនថ្ងៃទី៦ ខែមេសា ឆ្នាំ២០២៤ ដើម្បីពង្រីកផ្សព្វផ្សាយគុនខ្មែរ។
ក្នុងឱកាសពិធីសន្តិសីទសារព័ត៌មាន ប្រកាសពីបញ្ជូនកីឡាករឃីកបុកស៊ីងកម្ពុជា នាថ្ងៃទី២ ខែមេសា ឆ្នាំ២០២៤ លោក Tommy Kim ទីប្រឹក្សាទូរទស្សន៍ TOWN បានឲ្យដឹងថា មូលហេតុជ្រើសរើសយកកីឡាករ ម៉ឺន មេឃា ទៅប្រកួតនៅប្រទេសចិននេះគឺដោយសារតែសមត្ថភាពខ្លាំងរបស់គេ ពិសេសកេរ្តិ៍ឈ្មោះល្បីដែលធ្លាប់យកឈ្នះជើងខ្លាំងចិនកុងហ្វូកន្លងទៅ។
ទីប្រឹក្សាទូរទស្សន៍ TOWN ខាងលើបន្ថែមទៀតថា ស្ថានីយរបស់លោកមិនត្រឹមផ្សព្វផ្សាយគុនខ្មែរក្នុងស្រុកនោះទេ ពោលពង្រីកបន្ថែមទៀតទៅកាន់ប្រទេសផ្សេងៗតាមដែលអាចធ្វើទៅបាន។ យ៉ាងណាការពង្រីកផ្សព្វផ្សាយនេះបើគ្មានការជួយឧបត្ថម្ភគាំទ្រពីបណ្ដាក្រុមហ៊ុនជាដៃគូនេះក៏អាចធ្វើទៅរួចដែរ។លោកថ្លែងអំណរគុណដល់ក្រុមហ៊ុន GANZBERG ដែលបានឧបត្ថម្ភកន្លងមកពិសេសការចេញទៅប្រកួតរបស់ ម៉ឺន មេឃា លើកនេះទៀតផង។
ដោយឡែកលោក ហេង សុឃន បានអោយដឹងថា ការប្រកួតខាងលើកនេះកម្ពុជា បានបញ្ជូនកីឡាករឃីកបុកស៊ីង ម៉ឺន មេឃា ត្រូវប៉ះជាមួយកីឡាករឃីកបុកស៊ីង ឬកុងហ្វូរបស់ប្រទេសចិន គឺកីឡាករ ហ្វាង គឺជីង ដែលប្រព្រឹត្តិទៅថ្ងៃទី៦ ខែមេសា ឆ្នាំ២២៤ នៅប្រទេសចិន ។ ក្រោយពីឃើញការប្រកួត កីឡាករ ឃីកបុកស៊ីងកម្ពុជា ម៉ឺន មេឃា កន្លងមក ភាគីចិនក៏បានអនុញ្ញាត ឲ្យកីឡាករកម្ពុជា ចូលរួមប្រកួតនឹងកីឡាករ ជើងខ្លាំងរបស់ខ្លួន ។
លោកបានបន្តថា កីឡាករឃីកបុកស៊ីង ម៉ឺន មេឃា ធ្លាប់ប្រកួតឈ្នះកីឡាករឃីកបុកស៊ីងចិនម្តងហើយ នៅប្រទេសកម្ពុជា ដូច្នេះលោកមានសង្ឃឹមថា កីឡាករឃីកបុកស៊ីង ម៉ឺន មេឃានឹងធ្វើបានល្អ សម្រាប់ការប្រកួត នៅប្រទេសចិនលើកនេះ។
បញ្ជាក់ដែរថា កីឡាករ ម៉ឺន មេឃា នឹងត្រូវប្រកួតលក្ខណៈ Kick Boxing ជាមួយកីឡាករចិន ឈ្មោះ FANG KEJIN នៅថ្ងៃទី៦ ខែមេសា ឆ្នាំ២០២៤ នៅប្រទេសចិន។ មេឃា និងឪពុក រួមទាំងក្រុមការងារនឹងចាកចេញពីកម្ពុជានៅថ្ងៃទី៤ មេសា ស្អែកនេះហើយ៕
