ក្រសួងវប្បធម៌៖ ការតែងនិពន្ធដែលមិនមានក្រមសីលធម៌ ក្រសួងនឹងកោះហៅអ្នកនិពន្ធ និងអ្នកសម្តែងមកធ្វើការអប់រំណែនាំ

(ភ្នំពេញ)៖ បន្ទាប់ពីថ្មីៗនេះ អ្នកសិល្បៈមួយ ដែលជាតារាកំប្លែង បានច្រៀង និងផលិតវីដេអូចម្រៀង ដើម្បីផ្សព្វផ្សាយឲ្យមហាជនលេងល្បែងអនឡាញ ប្រធាននាយកដ្ឋានភាពយន្ត នៃក្រសួងវប្បធម៌ និងវិចិត្រសិល្បៈ នៅថ្ងៃទី១២ ខែកុម្ភៈ ឆ្នាំ២០២៤ បានថ្លែងថា ករណីដែលការតែងនិពន្ធដែលមិនមានក្រមសីលធម៌ ក្រសួងនឹងកោះហៅអ្នកនិពន្ធ និងអ្នកសម្តែងមកធ្វើការអប់រំណែនាំ។

លោក ប៉ុក បូរក្ស ប្រធាននាយកដ្ឋានភាពយន្ត នៃក្រសួងវប្បធម៌ និងវិចិត្រសិល្បៈ បានអោយដឹងថា «ករណីនេះ ខ្ញុំសូមជម្រាបជូនថា ក្រសួងពុំមានគោលការណ៍ត្រួតពិនិត្យលើការតែងនិពន្ធបទចម្រៀងនោះ នេះជាគោលការណ៍នៃការគោរពសិទ្ធិសេរីភាពនៃការបញ្ចេញមតិ។ ករណីដែលការតែងនិពន្ធដែលមិនមានក្រមសីលធម៌ ក្រសួងនឹងកោះហៅអ្នកនិពន្ធ និងអ្នកសម្តែងមកធ្វើការអប់រំណែនាំ»។

ជាមួយនេះ លោក ប៉ុក បូរក្ស បានបន្តថា លោកក៏បានពិនិត្យឃើញថា មកដល់ពេលនេះវីដេអូចម្រៀងនោះ បានលុបចេញពីប្រព័ន្ធផ្សព្វផ្សាយ ហើយសិល្បករ ដែលសម្តែងក៏បានចេញវីដេអូសុំទោសហើយដែរ។

ស្របពេលជាមួយគ្នានេះដែរ ពាក់ព័ន្ធនឹងបញ្ហាអ្នកសិល្បៈ សមាគមសិល្បករខ្មែរ បានចេញសេចក្តីថ្លែងការណ៍មួយ ដោយប្រកាសមិនគាំទ្រអ្នកសិល្បៈរូបណា ដែលប្រើឈ្មោះជាសិល្បករ ហើយទៅប្រព្រឹត្តរឿងមិនគប្បីនោះឡើយ។ សេចក្តីថ្លែងការណ៍ បានបញ្ជាក់យ៉ាងដូច្នេះថា «ដើម្បីចូលរួមការពារមុខមាត់ កិត្តិយសសេចក្ដីថ្លៃថ្នូរសម្រាប់បងប្អូនសិល្បករសិល្បការិនីទូទៅ ជាពិសេសដើម្បីចូលរួមការពារគុណតម្លៃមិនអាចកាត់ថ្លៃបាននៃសិល្បៈវប្បធម៌ដ៏ល្អផូរផង់របស់ជាតិយើង សមាគមសូមមិនគាំទ្រជាដាច់ខាតចំពោះបងប្អូនសិល្បករណា ឬបុគ្គលណា ប្រើឈ្មោះជាសិល្បករ ហើយទៅប្រព្រឹត្តរឿងមិនគប្បីនោះឡើយ»។

ជាមួយគ្នាប្រធានវិទ្យាស្ថានទំនាក់ទំនងអន្តរជាតិនៃ រាជ្យបណ្ឌិត្យសភា លោកបណ្ឌិត គិន ភា បានលើកឡើងថា បទថ្មីរបស់ នាយគ្រឿន ជាសញ្ញាប្រកាសអាសន្ន ខាងផ្នែកសីលធម៌សង្គម។ លោកថា «សិល្បៈជាកញ្ចក់សង្គម, តើសង្គមយើងមានទម្រង់ដូចអ្នកសិល្បៈក្រុមនេះសម្តែងឬ? តើការផ្សាយពាណិជ្ជកម្មលើកទឹកចិត្តឱ្យប្រជាជនលេងល្បែងជាអំពើខុសច្បាប់ដែរឬទេ? បើមិនខុសច្បាប់, តើវាខុសខាងផ្នែកសីលធម៌ដែរឬទេ?»។

សូមជម្រាបថា ដោយសារប្រតិកម្មខ្លាំងៗពីអ្នកជំនាញ និងមហាជនផងនោះ នាយគ្រឿងបានចេញវីដេអូសុំទោសជាសាធារណៈ និងសម្រេចលុបបទចម្រៀង ផ្សាយពីល្បែងអនឡាញនោះ ចេញពីបណ្តាញសង្គមវិញហើយ នៅល្ងាចថ្ងៃទី១២ ខែកុម្ភៈ ឆ្នាំ២០២៤៕