នាយករដ្ឋមន្ត្រី ហាមពិធីករ ពិធីការិនី ផ្សព្វផ្សាយការសេពគ្រឿងស្រវឹងនៅលើឆាកតន្ដ្រី
ភ្នំពេញ ៖ ថ្លែងក្នុងពិធីបិទសន្និបាតបូកសរុបការងារឆ្នាំ២០២៣ និងលើកទិសដៅការងារបន្ត ឆ្នាំ២០២៤ របស់ក្រសួងព័ត៌មាន” នារសៀលថ្ងៃ ត្រូវនឹងថ្ងៃទី២៣ មករា ២០២៤ សម្តេចធិបតី នាយករដ្ឋមន្ត្រី បានប្រកាសហាមមិនឲ្យពិធីករ ពិធីការរិនី ធ្វើការផ្សព្វផ្សាយការសេពគ្រឿងស្រវឹង នៅលើឆាកតន្ត្រី នោះទេ ។
ការប្រកាសនេះ បន្ទាប់ពីសម្តេចធិបតី បានឲ្យក្រសួងព័ត៌មាន ធ្វើការហាមឃាត់ដល់បណ្តាញផ្សព្វផ្សាយទាំងអស់ កុំធ្វើការផ្សព្វផ្សាយគ្រឿងស្រវឹង មានរូបភាពដូចជាគាស់កំប៉ុងនៅឆាក និងកញ្ចក់ទូរទស្សន៍ ជាដើម។ សូមកុំធ្វើការផ្សព្វផ្សាយសកម្មភាពសេពគ្រឿងស្រវឹងនៅលើឆាកតន្ដ្រី។
សម្ដេចធិបតី បានក្រើនរម្លឹក គ្រប់ស្ថានីយទូរទស្សន៍ទាំងអស់ ត្រូវបញ្ឈប់ការហៅមនុស្សឱ្យឡើងទៅលើឆាក ហើយគាស់គ្រឿងស្រវឹង ដែលជាកំហុសខុសឆ្គងយ៉ាងខ្លាំង។ ចំណែកឯ ក្រមសីលធម៌ និងការទទួលខុសត្រូវរបស់អ្នកសារព័ត៌មាន ត្រូវរួមគ្នាទប់ស្កាត់ នៃការផ្សព្វផ្សាយគ្រឿងស្រវឹង និងស្នើឱ្យអ្នកសារព័ត៌មានបង្កើនការផ្សព្វផ្សាយអប់រំ ប្រជាពលរដ្ឋឱ្យមានការយល់ដឹងអំពីផលប៉ះពាល់ នៃគ្រឿងស្រវឹង ។ លើសពីនេះទៅទៀត អ្នកសារព័ត៌មានទាំងអស់ ត្រូវរួមគ្នារក្សាតម្លៃនិងក្រមសីលធម៌ វិជ្ជាជីវៈ សារព័ត៌មាន ឱ្យបានខ្ជាប់ខ្ជួន ។
សូមជម្រាបជូនថា ក្រោមការដឹកនាំប្រកបដោយភាពប៉ិនប្រសប់ និងឈ្លាសវៃ របស់សម្ដេចអគ្គមហាសេនាបតីតេជោ ហ៊ុន សែន ក្នុងនីតិកាលទី៦ និងសម្តេចមហាបវរធិបតី ហ៊ុន ម៉ាណែត ក្នុងនីតិកាលទី៧ នៃរដ្ឋសភា វិស័យព័ត៌មាន និងសោតទស្សន៍ កាន់តែមានការរីកចម្រើនបន្ថែមទៀត ស្របតាមការវិវត្តរីកចម្រើន នៃបច្ចេកវិទ្យា ព័ត៌មាននាពេលបច្ចុប្បន្ន ។
ប្រព័ន្ធផ្សព្វផ្សាយប្រកបដោយភាពចម្រុះ និងគ្រប់ទស្សនៈ បាននិងកំពុងបំពេញតួនាទីភារកិច្ចយ៉ាងសកម្ម ក្នុងការផ្សព្វផ្សាយព័ត៌មាន ព្រឹត្តិការណ៏ ឬហេតុការផ្សេងៗ ដែលបានកើតឡើងទាំង ក្នុងប្រទេស និងពិភពលោក ។ បន្ថែមពីនេះ ភាពសម្បូរបែប នៃមធ្យោបាយរបស់ប្រព័ន្ធផ្សព្វផ្សាយនៅកម្ពុជា នាពេលបច្ចុប្បន្ន ក៍បានអនុញ្ញាតឱ្យសាធារណជនអាចទទួលបានព័ត៌មានគ្រប់ពេលវេលា និងគ្រប់ទីកន្លែងផងដែរ៕
