Ronaldo ស្នើសុំទៅអ្នកគាំទ្ររឿងមួយ ជួយអោយក្រុមមានសង្ឃឹមយកឈ្នះ Atletico នៅជើងទី២

Cristiano Ronaldo បានជំរុញអោយអ្នកគាំទ្រ Juventus មានទំនុកចិត្តសំរាប់ការប្រកួតជើងទី២ វគ្គ១៦ក្រុមចុងក្រោយ Champions League ទល់នឹង Atletico Madrid ហើយរូបគេបានស្នើសុំអោយអ្នកគាំទ្រ ធ្វើអោយការប្រកួតនោះជារាត្រីមួយ ដែលគួរអោយចងចាំមិនអាចបំភ្លេចបាន។

Atletico បានទទួលបានជ័យជំនះនៅក្នុងការប្រកួតជើងទី១ ក្នុងលទ្ធផល ២-០ ហើយបានធ្វើដំនើរមកកាន់ទីក្រុងទូរីន សំរាប់ការប្រកួតជើងទី២ ខណៈដែលក្រុមដឹកនាំដោយគ្រូបង្វឹក Diego Simeone មានភាគរយខ្ពស់ ក្នុងការឡើងទៅវគ្គបន្ទាប់។

ទោះយ៉ាងណាក្ដី គេនៅមានជំនឿចិត្តថា ក្រុមសេះបង្កង់ អាចនឹងផ្លាស់ប្ដូរស្ថានការណ៍ ហើយនាំយកជ័យជំនះផ្គាប់ចិត្តអ្នកគាំទ្រ នេះបើតាមសំដីរបស់តារាឆ្នើម Ronaldo។

ខ្សែប្រយុទ្ធព័រទុយហ្គាល់បាននិយាយថា៖  “នៅយប់ថ្ងៃអង្គារនេះ សូមគិតបែបវិជ្ជមាន ហើយនឹងមានជំនឿ៉ចិត្ត។ វាអាចទៅរួច ក្នុងការវាយបកយកឈ្នះ Atletico ប៉ុន្ដែ ពួកគេត្រូវការការជួយពីអ្នកទាំងអស់គ្នា ក្នុងការធ្វើអោយកីឡដ្ឋានមើលទៅ ស្រស់ស្អាត និង អស្ចារ្យ។ គ្រប់យ៉ាងសំរាប់គ្រប់គ្នា។

“ហើយយើងត្រូវការការជួយ ព្រោះយើងត្រូវធ្វើការរបស់យើង នៅលើទីលាន ក្នុងការព្យាយាមរកគ្រាប់បាល់ ហើយឈ្នះការប្រកួត ហើយយើងត្រូវការការគាំទ្រពីអ្នកទាំងអស់គ្នា។ អរគុណខ្លាំងណាស់ សូមត្រៀមខ្លួន សំរាប់ការវាយបក!”