ទូរទស្សន៍ថោន បើកសង្វៀនថ្មីមួយទៀតបើគាំទ្រខ្លាំង នឹងចេញរាជសីហ៍ឈុតធំក្នុងប្រវត្តិសាស្ត្រគុនខ្មែរបន្តទៀត!
ភ្នំពេញ: ស្ថានីយទូរទស្សន៍ថោនបានធ្វើសន្និសីទសារព័ត៌មាន នារសៀលថ្ងៃទី២៥ ខែតុលា ឆ្នាំ២០២៣ ដើម្បីបង្ហាញពីការបើកជាផ្លូវការនូវកម្មវិធីប្រកួតកីឡាប្រដាល់បន្ថែមមួយទៀតនៅរៀងរាល់យប់ថ្ងៃព្រហស្បត្តិ៍។ ព្រឹត្តិការណ៍នេះត្រូវបានគេប្រសិទ្ធនាមថា GANZBERG គុនខ្មែរ រាជសីហ៍ទាំង៥ ដែលបានឧបត្ថម្ភផ្តាច់មុខដោយស្រាបៀរ Ganzberg ។
លោកគឹម ស៊្រុនកុសល ទីប្រឹក្សាជាន់ខ្ពស់ក្រុមហ៊ុនថោនគ្រុប បានអោយដឹងថា ព្រឹត្តិការណ៍ GANZBERG គុនខ្មែរ រាជសីហ៍ទាំង៥ នេះឡើងគឺដើម្បីរៀបចំឲ្យមានការប្រកួតដណ្តើមខ្សែរក្រវាត់លក្ខណៈពិភពលោក។ លោកថា បើមានការគាំទ្រខ្លាំង ពីសំណាក់មហាជន ដែលជាអ្នកគាំទ្រវិស័យកីឡាប្រដាល់គុនខ្មែរនោះ ថោន អាចចេញរាជសីហ៍ឈុតធំ ក្នុងប្រវត្តិសាស្ត្រគុនខ្មែរបន្តទៀត។
តំណាងស្ថាប័ន IPCC ពិភពលោកប្រចាំប្រទេសកម្ពុជា និងជាទីប្រឹកក្សាក្រុមហ៊ុនថោនគ្រុប បានអោយដឹងថា «បើកមុខរាជសីហទាំង៥ ថោនព្យាយាមបង្កើតកម្មវិធីប្រកួតខ្នាតធំឱ្យបានច្រើន ដើម្បីបណ្តុះកីឡាករជំនាន់ក្រោយ និងចូលរួមចំណែកក្នុងការលើកស្ទួយវិស័យកីឡាប្រដាល់គុនខ្មែរឱ្យមានការរីកចម្រើនបន្ថែមទៀត បើសិនជាមានការគាំទ្រខ្លាំង ថោនអាចចេញរាជសីហ៍ឈុតធំក្នុងប្រវត្តិសាស្ត្រគុនខ្មែរបន្តទៀត» ។ លោកថា គុនខ្មែរត្រូវបានស្វាគមន៍ចូលជាសមាជិកគ្រួសារស្ថាប័នប្រដាល់អន្តរជាតិ IPCC ។ កិច្ចខិតខំប្រឹងប្រែងនៃពិភពប្រដាល់គុនខ្មែរបានធ្វើឲ្យពិភពលោករំជើបរំជួលទទួលស្គាល់ពីភាពរស់រវើកនៃក្បាច់គុនខ្មែរយ៉ាងសម្បូរបែប ដែលវាគឺជាមោទកភាពជាតិខ្មែរជាខ្លាំង។ ជោគជ័យនេះ បានកើតចេញពីស្មារតីខ្មែរដែលរួបរួមសាមគ្គីគ្នា» ។
ដោយឡែកលោកតែម ម៉ឺន ប្រធានសហព័ន្ធកីឡាប្រដាល់កម្ពុជា បានឲ្យដឹងថា «ខាងសហព័ន្ធកីឡាប្រដាល់កម្ពុជាមានការយកចិត្តទុកដាក់ខ្លាំង និងសហការបានល្អជាមួយស្ថានីយដើម្បីពង្រឹងសមត្ថភាពអាជ្ញាកណ្ដាល ចៅក្រម និងមន្ត្រីបច្ចេកទេសរបស់សហព័ន្ធឲ្យកាន់តែល្អដើម្បីផ្តល់ទំនុកចិត្តយ៉ាងរឹងមាំ និងទទួលការគាំទ្រពីមហាជនដែលគិតមកដល់ពេលនេះមានភាពរលូនល្អ តាមរយៈការសហការល្អជាមួយសហព័ន្ធកីឡាប្រដាល់កម្ពុជា និងការរៀបចំជ្រើសរើសកីឡាករមានសមត្ថភាពល្អៗ ព្រមទាំងផ្តល់ភាពសុក្រឹត និងយុត្តិធម៌ក្នុងការវិនិច្ឆ័យឈ្នះចាញ់ដោយតម្លាភាព។ កម្មវិធីនេះ នឹងជួយពង្រឹងសមត្ថភាព និងហ្វឹកហាត់ ដល់កីឡាករប្រដាល់គុនខ្មែរ»។
ដោយឡែកតំណាងក្រុមហ៊ុន GANZBERG បានអោយដឹងថា ក្រុមហ៊ុនGANZBERG មានឆន្ទៈលើកស្ទួយគុនខ្មែរទាំងក្នុងស្រុក និងក្រៅស្រុក។ គុនខ្មែរ រាជសីទាំង 5 ” ព្រឹត្តិការណ៍នេះកាន់តែលើកកម្ពស់គុនខ្មែរ វប្បធម៍ក្បាច់គុនខ្មែរ ថ្ងៃនេះជាការបើកទំព័រដំបូង របស់យើងជាមួយ Town ដើម្បីលើកស្ទួយគុនខ្មែរ “GANZBERGអោយកាន់តែល្បី។ កីឡាករប្រដាល់របស់យើងគ្រប់រូបសមនឹងទទួលបានការគាំទ លើកទឹកចិត្តពីទស្សនិជនគ្រប់ៗ គ្នាអោយពិភពលោកបានឃើញកីឡាករគុនខ្មែរមានគុណភាពខ្លាំងពូកែ។
សូមជម្រាបផងដែរថា ការប្រកួតប្រដាល់គុនខ្មែរដ៏ធំ អស្ចារ្យរបស់ស្ថានីយទូរទស្សន៍ថោន Ganzberg រាជសីគីនខ្មែរ ដែលជាសង្វៀនប្រដាល់គុនខ្មែរដ៏ថ្មីស្រឡាងមួយទៀត ដើម្បីចូលរួមផ្សព្វផ្សាយលើកស្ទួយ និងផ្ដល់ឱកាសឲ្យកីឡាករគុនខ្មែរ ដែលខិតខំហ្វឹកហាត់អស់រយៈកាលជាច្រើនឆ្នាំ បានចូលរួមប្រកួតនៅលើសង្វៀនដ៏ធំនេះ បានបង្ហាញសមត្ថភាពរបស់ខ្លួនទៅកាន់អន្តរជាតិ៕
