លោកHonda ជឿជាក់លើក្រុមបាល់ទាត់កម្ពុជា អាចធ្វើបានសម្រាប់ការប្រកួតជាមួយ ប៉ាគីស្ថាន ជើងទី២
បាល់ទាត់៖ លោក Keisuke Honda ដែលជាអតីតគ្រូបង្វឹកក្រុមបាល់ទាត់ជម្រើសជាតិកម្ពុជា ជឿជាក់លើក្រុមបាល់ទាត់ជម្រើសជាតិកម្ពុជា អាចធ្វើបានសម្រាប់ការប្រកួតជាមួយ ប៉ាគីស្ថាន ជើងទី២ វគ្គជម្រុះជុំ១ ជើងឯកពិភពលោកឆ្នាំ២០២៦ វេលាម៉ោង៤រសៀល ថ្ងៃទី១៧ ខែតុលានេះ។
ជើងទី១ រវាងជម្រើសជាតិកម្ពុជា អាចធ្វើបានសម្រាប់ការប្រកួតជាមួយ ប៉ាគីស្ថាន កាលពីថ្ងៃទី១២ ខែតុលា នៅពហុកីឡដ្ឋានអូឡាំពិក រាជធានីភ្នំពេញ ក្រុមទាំងពីរមិនមានឱកាសបំប៉ោងសំណាញ់ទីគ្នានោះទេ ពោលគឺក្នុងលទ្ធផលស្មើគ្នា ០-០។ ប៉ុន្តែអ្វីដែលក្រុមកម្ពុជាត្រូវធ្វើការធ្ងន់ថែមទៀតនៅពេលប្រកួតជើងទី២ លើទឹកដីរបស់ប៉ាគីស្ថាន។ ជើងទី១ ក្រុមប៉ាគីស្ថាន បានប្រើក្បាច់ការពារយ៉ាងល្អដោយមិនភ្លាត់ឲ្យកម្ពុជាបំប៉ោងសំណាញ់ទីរបស់ខ្លួនបានឡើយ។
ក្រៅពីការការពារបានល្អ ប៉ាគីស្ថាន ក៏ប្រើទម្រង់វាយបកដ៏គ្រោះថ្នាក់ផងដែរ ហើយការលេងក្នុងដីរបស់ខ្លួនរឹតតែធ្វើឲ្យក្រុមមួយនេះមានទំនុកចិត្តក្នុងការស្វែងរកជ័យជម្នះលើកម្ពុជា។ ក្នុងប្រវត្តិជួបគ្នា៤លើកគិតទាំងកាលពីថ្ងៃទី១២ ខែតុលា ប៉ាគីស្ថាន មិនធ្លាប់ឈ្នះកម្ពុជាឡើយ។
មុនការប្រកួតមកដល់ លោក Keisuke Honda បាននិយាយថា ៖«ជូនពរឲ្យក្រុមជម្រើសជាតិកម្ពុជាទទួលបានលទ្ធផលល្អ និងជឿជាក់ថា កម្ពុជាអាចធ្វើបាន»។ ការប្រកួតជើងទី២ ថ្ងៃទី១៧ ខែតុលា ឆ្នាំ២០២៣ ធ្វើនៅកីឡដ្ឋាន Jinnah ក្នុងទីក្រុង អីស្លាម៉ាបាដ វេលាម៉ោង៤ រសៀល៕
