ម្ចាស់សហគ្រាសលាង ឡេង ៖ កូនខ្មែរយើងមានសមត្ថភាពគ្រប់គ្រាន់ ក្នុងការផលិតនូវគ្រឿងឧបភោគ និងបរិភោគ ដែលមានគុណភាពល្អ
ភ្នំពេញ៖ លាង ឡេង ជាឈ្មោះសហគ្រាសផលិតទឹកត្រីក្នុងស្រុកមួយកន្លែង កំពុងផលិតនូវគ្រឿងទេសយ៉ាងមមាញឹកដើម្បីបំពេញតម្រូវជូនដល់អតិថិជនដែលតែងតែនិយមគាំទ្រ និងលើកកម្ពស់ផលិតផលក្នុងស្រុកមានគុណភាព សុវត្ថិភាព និងផលិតចេញពីវត្ថុធាតុដើមក្នុងស្រុកទាំងអស់ ខណៈម្ចាស់សហគ្រាសថា កូនខ្មែរយើងមានសមត្ថភាពគ្រប់គ្រាន់ ក្នុងការផលិតនូវគ្រឿងឧបភោគ និងបរិភោគ ដែលមានគុណភាពល្អ។
លោក លាង ឡេង ជាម្ចាស់សហគ្រាសលាង ឡេងបានអោយដឹងថា ផលិតផលរបស់សហគ្រាសមួយនេះមានចំនួន ៥មុខ ដែលសុទ្ធសឹងតែទទួលបានការគាំទ្រច្រើន ដោយសារតែផលិតពីវត្ថុធាតុដើមក្នុងស្រុក ដែលជាផ្នែកមួយជួយដល់ជីវភាពបងប្អូនអ្នកនេសាទ កសិករ ក៏ដូចជាប្រជាក្នុងសហគមន៍ផងដែរ។ អ្វីដែលជាការចូលរួមគឺមិនថាសហគមន៍អ្នកនេសាទ អ្នកកែច្នៃអំបិល ឬក៏កសិករដែលដាំម្ទេសប៉េងប៉ោះនោះទេ គឺសហគ្រាសរបស់លោកទទួលទិញតែកសិករដែលដាំដុះនៅលើដីដែលបានកាន់កាប់ជាយូឆ្នាំប៉ុណ្ណេះ។
លោក លាង ឡេង នាយកគ្រប់គ្រងសហគ្រាស លាង ឡេង បានមានប្រសាសន៍ថា៖«ផលិតផលសំខាន់ៗរបស់សហគ្រាសទឹកត្រី លាង ឡេង រួមមាន ដូចជាទឹកត្រី ទឹកស៊ីអីវ ទឹកម្ទេស ប្រេងខ្យង ទឹកសៀង និងទឹកខ្មេះ។ ផលិតផលទឹកត្រីគឺជាផលិតគោលរបស់សហគ្រាសស្មើ ៣០% នៃផលិតផលសរុប។ លក្ខណៈពិសេសរបស់ទឹកត្រី លាង ឡេង គឺប្រើត្រីទឹកសាបស្រស់ៗ (ត្រីរៀល) ពេញ១ឆ្នាំ និង បច្ចេកទេសផ្អាប់និងស្លទឹកត្រីពិសេសដែលពុំបង្កប្រតិកម្មឬអាលាកហ្សីដល់អ្នកប្រើប្រាស់»។
លោកបន្ថែមថា «បច្ចុប្បន្ននេះ កូនខ្មែរយើងមានសមត្ថភាពគ្រប់គ្រាន់ ក្នុងការផលិតនូវគ្រឿងឧបភោគ (គ្រឿងប្រើប្រាស់) និងបរិភោគ (គ្រឿងហូបចុក) ដែលមានគុណភាពល្អ។ គំនិតរបស់ខ្ញុំពេលនេះគឺធ្វើយ៉ាងណាចាប់យកទីផ្សារស្រុកខ្មែរឲ្យជាប់ ខ្ញុំមិនចង់ឲ្យខ្មែរយើងប្រើផលិតផលបរទេស ខ្មែរយើងឲ្យតម្លៃផលិតផលបរទេស ព្រោះខ្មែរយើងពីមុនផលិតរបស់មិនសូវបានល្អ ខ្ញុំទទួលស្គាល់។ តែខ្មែរយើងឥឡូវនេះផលិត បាននូវផលិតផលដែល ឆ្ងាញ់ ហើយមានអនាម័យដូចគេអ៊ីចឹង គុណភាពក៏ល្អទៅតាមស្តង់ដារដែរ»។
ក្រៅពីការគាំទ្រក្នុងស្រុក ផលិតផលរបស់សហគ្រាស លាង ឡេង ក៏ទទួលបានការចាប់អារម្មណ៍ពីសំណាក់ពាណិជ្ជករក្រៅប្រទេស ដោយមានអ្នកជំនួញបរទេសមកសិក្សាពីផលិតផល និងត្រៀមវិនិយោគធ្វើការនាំចេញ ហើយសហគ្រាសនេះក៏ធ្លាប់បាននាំចេញសាកល្បងខ្លះៗរួចមកហើយ។ ជាមួយគ្នានេះដែរ ម្ចាស់សហគ្រាស លាង ឡេង សូមអំពាវនាវឱ្យប្រជាពលរដ្ឋខ្មែរជួយគាំទ្រនូវផលិតផលទឹកត្រី និងទឹកស៊ីអ៊ីវរូបត្រីកញ្ចាញ់ច្រាស ពីព្រោះវាជាផលិតផលរបស់ខ្មែរសុទ្ធសាធ ហើយវាគុណភាព តាមស្តង់ដារ ISO ។
ម្យ៉ាងការគាំទ្រផលិតផលរបស់ខ្មែរយើង ក៏ជាបង្កើតនូវការងារឲ្យកូនខ្មែរយើងធ្វើ ហើយក៏កាត់បន្ថយនូវការចំណាកស្រុកផងដែរ។ ក្រៅពីការដាក់លក់នៅតាមទីផ្សារក្នុងស្រុកធំៗ នៅក្នុងប្រទេសកម្ពុជា ផលិតផលរបស់សហគ្រាសលាង ឡេង ក៏បាននាំចេញទៅទីផ្សារក្រៅប្រទេសផងដែរ ហើយបច្ចុប្បន្ននេះ លោកក៏កំពុងតែចរចា ដើម្បីនាំទៅកាន់ទីផ្សារសហរដ្ឋអាមេរិកទៀត។
សហគ្រាសលាង ឡេង ជាសហគ្រាសមធ្យមមួយ បានកែច្នៃផលនិងផលិតផលជលផល ដែលអនុលោមបានផ្នែកសុវត្ថិភាពម្ហូបអាហាររបស់សហគ្រាសជលផលកម្ពុជា រហូតទទួលបានវិញ្ញាបនបត្រនិមិត្តសញ្ញាគុណភាពផល ផលិតផលជលផលកម្ពុជា CQS ល្អបំផុត។ ប្រព័ន្ធវិញ្ញាបនបត្រ CQS គឺជួយបំពេញបន្ថែមកិច្ចខិតខំប្រឹងប្រែងរបស់រាជរដ្ឋាភិបាល ក្នុងការលើក កម្ពស់សុវត្ថិភាពម្ហូបអាហារសម្រាប់មនុស្សគ្រប់រូប និងពង្រីកទីផ្សារនាំចេញ៕
