សហជីពនៅបន្តរស្នើសុំប្រាក់ឈ្នូលកម្មករសម្រាប់ឆ្នាំ២០២៤ ២១៥ ដុល្លារដដែល និងស្នើសុំអត្ថប្រយោជន៍ផ្សេងៗទៀត
ក្រុមសហជីព កម្មករនៅបន្តរស្នើសុំប្រាក់ឈ្នូលកម្មករសម្រាប់ឆ្នាំ២០២៤ ចំនួន២១៥ ដុល្លារដដែល និងស្នើសុំអត្ថប្រយោជន៍ផ្សេងៗទៀតចំនួន១១។ តំណាងភាគីកម្មករលើកហេតុផលថា បើប្រាក់ខែគោលកម្មករទាបជាង២១៥ដុល្លារនោះកម្មករនឹងមិនអាចរស់នៅបានសមរម្យទេ ព្រោះថ្លែទំនិញលើទីផ្សារក៏ចេះតែបន្តកើនឡើង បូករួមការចំណាយផ្សេងៗទៀត។
កាលពីចុងខែសីហា សម្តេចនាយករដ្ឋមន្ត្រី ហ៊ុន ម៉ាណែត បានណែនាំឱ្យក្រសួងការងារនិងបណ្តុះបណ្តាលវិជ្ជាជីវៈ បន្តខិតខំសម្របសម្រួលការពិភាក្សាប្រាក់ឈ្នួលអប្បបរមាក្នុងផ្នែកវាយនភណ្ឌ កាត់ដេរ ផលិតស្បែកជើង និងផលិតផលិតផលធ្វើដំណើរនិងកាបូបសម្រាប់ឆ្នាំ២០២៤ ដោយឈរលើលក្ខណៈវិទ្យាសាស្ត្រ និងលក្ខណៈវិនិច្ឆ័យ ដែលមានចែងក្នុងច្បាប់ស្ដីពីប្រាក់ឈ្នួលអប្បបរមា ឱ្យបានមុនបុណ្យភ្ជុំបិណ្ឌ បើទោះដំឡើងប្រាក់ឈ្នួលកម្មករនិយោជិតបានតិច ឬច្រើនក្តី។
គួរបញ្ជាក់ថា ជារៀងរាល់ឆ្នាំ ក្រសួងការងារ តែងតែសម្របសម្រួល ឱ្យមានការកំណត់ប្រាក់ឈ្នួលគោលសម្រាប់កម្មករនិយោជិតក្នុងវិស័យកាត់ដេរ។ ហើយនៅក្នុងឆ្នាំ២០២៣ ប្រាក់ឈ្នួលគោលអប្បបរមារបស់កម្មករនិយោជិតទទួលបាន២០០ដុល្លារអាមេរិកក្នុងមួយខែ៕
