ផលិតផលជលផលរបស់កម្ពុជា «ជើងដំបូង» ត្រូវបាននាំចេញ ទៅកាន់ទីផ្សារប្រទេសចិន
(ភ្នំពេញ)៖ អ្នកនាំពាក្យក្រសួងកសិកម្ម បានអោយដឹងថា ផលិតផលជលផលរបស់កម្ពុជា «ជើងដំបូង» ត្រូវបាននាំចេញ ទៅកាន់ទីផ្សារប្រទេសចិនហើយនាថ្ងៃទី១៤ ខែកញ្ញា ឆ្នាំ២០២៣ បន្ទាប់ទទួលបានការអនុញ្ញាតពីរដ្ឋបាលគយចិន។
លោកជំទាវ អ៊ឹម រចនា អនុរដ្ឋលេខាធិការ និងអ្នកនាំពាក្យក្រសួងកសិកម្ម បានអោយដឹងថា ផលិតផលជលផលដែលបាននាំចេញទៅទីផ្សារចិន ជើងដំបូងនេះ គឺ កំពឹសទឹកសាបបង្កក និងអន្ទង់បង្កក ដែលជាផលិតផលជលផលធម្មជាតិ ដោយក្រុមហ៊ុនបានប្រមូលទិញពីប្រជានេសាទទូទៅ យកមកបង្កក ដើម្បីនាំចេញ។ ការនាំចេញផលិតផលជលផលកម្ពុជា ទៅកាន់ទីផ្សារប្រទេសចិនជាលើកដំបូងនេះ គឺជាជោគជ័យមួយជំហានរបស់កម្ពុជា។
អ្នកនាំពាក្យរូបនេះ បន្ថែមថា ការងារអាទិភាពដំបូង គឺធ្វើយ៉ាងណារក្សានូវគុណភាព ស្របតាមស្តង់ដារអនាម័យ និងភូតគាមអនាម័យ កំណត់ដោយរដ្ឋបាលគយចិន ដើម្បីធានាឲ្យបានថា ផលិតផលជលផលរបស់ខ្មែរនៅតែអាចនាំចូលទៅកាន់ទីផ្សារប្រទេសចិនបាន។ លោកជំទាវ បន្ថែមថា «ចំណែកការងារបន្ទាប់ គឺជំរុញឲ្យផលិតផលជលផលរបស់ខ្មែរ មានគុណភាពកាន់តែខ្ពស់ មានសោភណ្ឌភាពកាន់តែល្អ មានសុវត្ថិភាព និងមានរសជាតិកាន់តែឆ្ងាញ់ ក្នុងគោលដៅពង្រឹងនិងពង្រីកតម្រូវការរបស់អតិថិជននៅលើទីផ្សារប្រទេសចិន។ នៅពេលដែលសេចក្ដីត្រូវការនៅទីផ្សារចិនកើនឡើង ការនាំចេញផលិតផលជលផលពីកម្ពុជាទៅកាន់ប្រទេសចិននឹងមានកំណើន។ ចំណែកប្រជានេសាទ វារីវប្បករ អ្នកចិញ្ចឹមត្រីនៅស្រុកខ្មែរ នឹងមានការងារធ្វើកាន់តែច្រើន។
តាមរយៈការជំរុញការនាំចេញផលិតផលជលផលខ្មែរទៅកាន់ទីផ្សារប្រទេសចិននេះ ក្រសួងសង្ឃឹមថា វានឹងអាចជួយបង្កើនជីវភាពបងប្អូនប្រជានេសាទនិងវារីវប្បករនៅស្រុកខ្មែរយើងឲ្យកាន់តែមានការរីកចំរើនទៅមុខ និងរួមចំណែកជួយដល់កំណើនសេដ្ឋកិច្ចជាតិផងដែរ៕
