ពលរដ្ឋផ្ទុំការតវ៉ា បិទផ្លូវជាតិលេខ៥ ស្នើប្តូរទីតាំងរោងចក្រទឹកកកដែលធ្លាយឧស្ម័នអាម៉ូញ៉ាក់បង្កផលប៉ះពាល់
ភ្នំពេញ ៖ ប្រជាពលរដ្ឋប្រមាណ២ភូមិ រស់នៅសង្កាត់ច្រាំងចំរេះទី២ ខណ្ឌឬស្សីកែវ បានផ្ទុះការតវ៉ា ដោយលើកគ្នាបិទផ្លូវជាតិលេខ៥ ដើម្បី ទទូចស្នើសុំដល់អាជ្ញាធរ ចាត់វិធានការប្តូរទីតាំងរោងចក្រទឹកកក ដែលតែងតែបង្កការផ្ទុះធ្លាយឧស្ម័នអាម៉ូញ៉ាកប៉ះពាល់ដល់ការរស់នៅរបស់ប្រជាពលរដ្ឋនៅជុំវិញ។
ការតវ៉ានេះបានផ្ទុះឡើងកាលពីវេលាម៉ោងប្រមាណ៨និង៣០នាទីព្រឹកថ្ងៃទី០៥ ខែកញ្ញា ឆ្នាំ២០២៣ ដោយពួកគាត់បាននាំគ្នាផ្តិតមេដៃស្នើរសុំ និងលើកគ្នាបិទផ្លូវជាតិលេខ៥ នៅមុខទីតាំងរោងទឹកកក ដែលស្ថិតនៅក្រុមទី៧ ភូមិខ១ សង្កាត់ច្រាំងចំរេះទី២ ខណ្ឌឫស្សីកែវ រាជធានីភ្នំពេញ។
ប្រជាពលរដ្ឋ បានអោយដឹងថា ប្រជាពលរដ្ឋចំនួន២ភូមិ ដែលរងផលប៉ះពាល់ បាននាំគ្នា ផ្តិតមេដៃស្នើសុំ និងបានជួបប្រមូលម្តុំបិទផ្លូវជាតិលេខ៥នៅពេលនេះ ដើម្បីទទូចស្នើសុំដល់អាជ្ញាធរ ក៍ដូចជាក្រសួងពាក់ព័ន្ធចាត់វិធានការបិទនិងប្តូរទីតាំងរោងចក្រទឹកកកយីហោ«ឈាង មួ»ដែលតែងតែបង្កអោយមានការផ្ទុះធ្លាយឧស្ម័នអាម៉ូញ៉ាក់ប៉ះពាល់រស់ការរស់នៅរបស់ប្រជាពលរដ្ឋ ។
ពលរដ្ឋបានអោយដឹងទៀតថា កន្លងមក ទីតាំងរោងចក្រផលិតទឹកកកនេះ បានបង្កអោយមានការផ្ទុះធ្លាយជាតិអាម៉ូញ៉ាក់ជាបន្តបន្ទាប់ចំនួន៤ដងមកហើយ និងបង្កអោយមនុស្ស ស្លា.ប់ចំនួន២នាក់ផងដែរ។ លើកចុងក្រោយនេះ កាលពីយប់ថ្ងៃទី១ខែកញ្ញា បង្កអោយអ្នករស់នៅជុំវិញ ទាំងក្មេង ទាំងចាស់សរុបចំនួនជាង៣០នាក់ បានថប់ដង្ហើម និងខ្លះទៀតបានដួលសន្លប់ត្រូវបានជួយសង្គ្រោះ។
បន្ទាប់ពីមានការវ៉ាបិទផ្លូវជាតិលេខ៥ អាជ្ញាធរ ក៍បានចុះទៅណែនាំអោយប្រជាពលរដ្ឋបើកផ្លូវសម្រួលចរាចរណ៍ឡើងវិញ និងណែនាំអោយលើកគ្នាទៅផ្លូវបេតុងមុខទីតាំងរោងចក្រ ។ នៅព្រឹកនោះ អាជ្ញាធរខណ្ឌឬស្សីកែវ ក៍បានចុះទៅផ្អាក់អាជីវកម្ម សិប្បកម្ម ផលិតទឹកកកនោះ ជាបណ្តោះអាសន្នទាំង២ទីតាំងតែម្តង៕
