អ្នកលេងគុនខ្មែរចំនួន៤រូបរបស់កម្ពុជា ដណ្តើមបាន និងការពារខ្សែក្រវាត់ ពីកម្មវិធី គុនខ្មែរអលស្តា
អ្នកលេងគុនខ្មែរចំនួន៤រូបរបស់កម្ពុជា ដណ្តើមបាន និងការពារខ្សែក្រវាត់បាន ក្នុងប្រភេទគីឡូផ្សេងៗគ្នា នៃព្រឹត្តិការណ៍គុនខ្មែរអលស្តាវគ្គ៨ ធ្វើឡើងនៅពហុកីឡដ្ឋានអូឡាំពិក នារាត្រីថ្ងៃទី២២ ខែសីហា ឆ្នាំ២០២៣។
អ្នកប្រដាល់គុនខ្មែរទាំង៤រូបនោះរួមមាន ឡុង ពិសិដ្ឋ ឈ្នះខ្សែក្រវាត់ក្នុងប្រភេទទំងន់ ៥១គីឡូក្រាម ក្រោយឈ្នះអេលីត រស្មី ដោយពិន្ទុ។ ពេជ្រ ប៊ុនសិទ្ធ ឈ្នះខ្សែក្រវាត់ក្នុងប្រភេទទំងន់ ៥៧គីឡូក្រាម ក្រោយឈ្នះសូដា សូសែង ក្នុងទឹកទី២, រឿង សោភណ្ឌ័ ឈ្នះខ្សែក្រវាត់ក្នុងប្រភេទទំងន់ ៦៩គីឡូក្រាម ក្រោយឈ្នះកីឡាករម៉ារ៉ុក អោយចុះចាញ់ ត្រឹមទឹកទី១។ ចំណែកអេលីត សាន់ ដែលឡើងការពាខ្សែក្រវាត់គុនខ្មែរអលស្តា ក្នុងប្រភេទទំងន់៦០គីឡូក្រាម បន្តនៅគ្រងដដែលក្រោយឈ្នះ កីឡាករភូមា ដោយពិន្ទុ។
ក្នុងចំណោមកីឡាករដែលត្រូវប្រកួតដណ្តើមខ្សែក្រវាត់ និងការពាខ្សែក្រវាត់ទំាង៤រូបនេះ ក្នុងនោះកីឡាករចំនួន២រូបក៏ជាបេក្ខជនប្រកួតដណ្តើមឡានពីក្រុមហ៊ុន BOOSTRONG គឺអេលីត សាន់ និងរឿង សោភណ្ឌ័ ប៉ុន្តែអ្នកទាំងពីមិនបានជាប់ជាកីឡាករដែលត្រូវអ្នកគាំទ្របោះឆ្នោតអោយឈ្នះឡាននោះទេ ដោយសារតែសម្លេងរបស់អ្នកគាំទ្រច្រើនជាងគេបានទៅលើពេជ្រ សម្បត្តិ ដែលទទួលបានឡានទំនើបម្ចាស់ឧបត្ថម្ភ ដោយឡែកអ្នកដែលមិនទទួលបានឡានក្រុមហ៊ុនបានឧបត្ថម្ភលើកទឹកចិត្តក្នុងម្នាក់៤លានរៀល៕
