គណបក្សធម្មាធិបតេយ្យ ចាត់ទុកការសម្រេចអោយឯកឧត្តមហ៊ុន ម៉ាណែត ជានាយករដ្ឋមន្ត្រីថ្មី ពិតជាត្រឹមត្រូវ ដែលមិនធ្លាប់មានក្នុងប្រវត្តិសាស្ត្រខ្មែរ
ភ្នំពេញ៖ គណបក្សធម្មាធិបតេយ្យ ចាត់ទុកថា ការសម្រេចចិត្តរបស់សម្តេចតេជោហ៊ុន សែន ដែលអោយឯកឧត្តមបណ្ឌិត ហ៊ុន ម៉ាណែត ជានាយករដ្ឋមន្រ្តី សម្រាប់នីតិកាលទី៧ នៃព្រះរាជាណាចក្រកម្ពុជា ជាត្រឹមត្រូវដែលមិនធ្លាប់មានក្នុងប្រវត្តិសាស្ត្រខ្មែរកន្លងមក។ នេះបើយោងញាត្តិគាំទ្រ របស់គណបក្ស នាថ្ងៃទី២៧ ខែកក្កដានេះ។
គណបក្សធម្មាធិបតេយ្យ បានប្រកាសគាំទ្រយ៉ាងពេញទំហឹងនូវប្រសាសន៍របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលនៅរសៀលថ្ងៃទី២៦ ខែកក្កដា ឆ្នាំ២០២៣ បានប្រកាសជាសាធារណៈ លាលែងពីតំណែងនាយករដ្ឋមន្ត្រី ហើយបានផ្ទេរតំណែងនាយករដ្ឋមន្ត្រីនេះទៅឯកឧត្ដមបណ្ឌិត ហ៊ុន ម៉ាណែត ធ្វើជានាយករដ្ឋមន្ត្រី នៃព្រះរាជាណាចក្រកម្ពុជា ក្នុង អាណត្តិទី៧ នេះ។
បន្ថែមពីញាត្តិនេះ លោកស្រី សាវត្ថី ពោធិតី បានអោយដឹងថា មនុស្សយើងម្នាក់ៗមានខួរក្បាលខុសៗគ្នា ដូច្នេះការផ្លាស់ពីមនុស្សមួយទៅមនុស្សមួយទៀតនោះ ការដឹកនាំនឹងមានការផ្លាស់ប្តូរពុំខាន៕
