កម្ពុជា-ជប៉ុន នឹងចុះហត្ថលេខាលើកិច្ចព្រមព្រៀងឥណទាន ដែលមានទំហំទឹកប្រាក់ជិត២០០លានដុល្លារ នៅថ្ងៃស្អែក
(ភ្នំពេញ)៖ នៅថ្ងៃទី២០ ខែមិថុនា ឆ្នាំ២០២៣ ស្អែកកម្ពុជា-ជប៉ុន នឹងចុះហត្ថលេខាលើកិច្ចព្រមព្រៀងឥណទាន ដែលមានទំហំទឹកប្រាក់ជិត២០០លានដុល្លារ សម្រាប់គម្រោងចំនួន២ គឺគម្រោងតភ្ជាប់ផ្លូវថ្នល់ និងផ្គត់ផ្គង់ទឹក។ នេះបើយោងតាមសេចក្តីប្រកាសព័ត៌មានរបស់ក្រសួងការបរទេសនិងសហប្រតិបត្តិការអន្តរជាតិកម្ពុជា។
ពិធីចុះហត្ថលេខារួមគ្នានេះ នឹងធ្វើឡើងរវាងឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស និងសហប្រតិបត្តិការអន្តរជាតិ និងឯកឧត្តម អ៊ូអ៊ីណូ អាត់ស៊ូស៊ិ UENO Atsushi ឯកអគ្គរាជទូតជប៉ុនប្រចាំកម្ពុជា។ ដោយឡែកចំពោះលិខិតប្ដូរសារ និងឯកសារពាក់ព័ន្ធ ដែលនឹងចុះហត្ថលេខារួមគ្នារួមមាន៖ ទី១. ឥណទានសម្បទានប្រាក់យ៉េន ដែលមានទឹកប្រាក់ចំនួន ២៣ ៦៩២លានយ៉េន (ឬប្រមាណ ១៧២,៩៣លានដុល្លារអាម៉េរិក) សម្រាប់ការអនុវត្ត «គម្រោងកែលម្អ ការតភ្ជាប់ផ្លូវជនបទ»។ និងទី២. ឥណទានសម្បទានប្រាក់យ៉េន ដែលមានទឹកប្រាក់ចំនួន២០៨១លានយ៉េន (ឬប្រមាណ ១៥,១៨លានដុល្លារអាម៉េរិក) សម្រាប់ការអនុវត្ត «គម្រោងពង្រីកសមត្ថភាព ផ្គត់ផ្គង់ទឹកស្អាតខេត្តសៀមរាប ដំណាក់កាលទី៣»។
គូសបញ្ជាក់ផងដែរថា សេចក្តីប្រកាសព័ត៌មានដដែល បានឱ្យបន្ថែមថា ការផ្ដល់ជំនួយខាងលើបញ្ជាក់ពីការប្ដេជ្ញាចិត្តឥតងាករេ របស់ជប៉ុន ក្នុងការគាំទ្រដល់កិច្ចខិតខំប្រឹងប្រែង ជាបន្តបន្ទាប់របស់រាជរដ្ឋាភិបាលកម្ពុជា ក្នុងការជំរុញការអភិវឌ្ឍសង្គម-សេដ្ឋកិច្ច។ ការគាំទ្រនេះ ក៏នឹងរួមចំណែកផងដែរ ដល់ការពង្រឹងទំនាក់ទំនងយូរអង្វែង និងកិច្ចសហប្រតិបត្តិការដ៏ជិតស្និទ្ធរវាងប្រទេសទាំងពីរដែលនាពេលថ្មីនេះៗ បានដំឡើងទំនាក់ទំនងទ្វេភាគី ទៅជាកម្រិត «ភាពជាដៃគូយុទ្ធសាស្ត្រគ្រប់ជ្រុងជ្រោយ» ខណៈពេលដែលប្រទេសទាំងពីរកំពុងប្រារព្ធខួបអនុស្សាវរីយ៍ លើកទី៧០ឆ្នាំ នៃទំនាក់ទំនងការទូត៕
