បណ្ឌិត ពេជ្រ ស្រស់៖សូមកូនខ្មែរគ្រប់រូបមើលរដ្ឋធម្មនុញ្ញកម្ពុជាមុននឹងនិយាយអ្វីចំពោះអង្គព្រះមហាក្សត្រ ចៀសវាងកសាងកំហុសលើទ្រង់
(រាជធានីភ្នំពេញ)៖ ឯកឧត្ដមបណ្ឌិត ពេជ្រ ស្រស់ ប្រធានគណបក្សយុវជនកម្ពុជា បានអំពាវនាវដល់ប្រជាពលរដ្ឋខ្មែរគ្រប់រូបឱ្យមើលរដ្ឋធម្មនុញ្ញកម្ពុជាមុននឹងនិយាយអ្វីចំពោះអង្គព្រះមហាក្សត្រ ចៀសវាងកសាងកំហុសលើទ្រង់។ ជាក់ស្ដែង តាមរយៈសំណេរលើទំព័រហ្វេសប៊ុកផ្លូវការ ឯកឧត្ដមបណ្ឌិតបានសរសេរថា៖ «ព្រះមហាក្សត្រកម្ពុជា ទ្រង់គ្រងរាជសម្បត្តិ ប៉ុន្តែទ្រង់មិនកាន់អំណាចឡើយ ព្រះមហាក្សត្រទ្រង់ជាព្រះប្រមុខរដ្ឋមួយជីវិត អង្គព្រះមហាក្សត្រមិនអាចនរណាបំពានបានឡើយ»។
ឯកឧត្ដមបណ្ឌិត ពេជ្រ ស្រស់ បន្ថែមថា៖ «កូនខ្មែរយើងអើយ មុននឹងបរិយាយអ្វីមួយអំពីទ្រង់ សូមកូនខ្មែរយើងចំណាយពេលអានរដ្ឋធម្មនុញ្ញកម្ពុជាត្រង់ មាត្រា៧បន្តិចទៅដើម្បីចៀសវាងកសាងកំហុសណាមួយទៅលើទ្រង់ហើយសូមកុំនិយាយអ្វីតាមទំនើងចិត្តចំពោះព្រះអង្គ ពីព្រោះព្រះអង្គទ្រង់គង់ជាម្លប់សម្រាប់ពួកយើងទាំងអស់គ្នា ម៉្យាងវិញទៀត សូមអ្នកនយោបាយគ្រប់និន្នាការកុំទាញទ្រង់ចូលឆាកនយោបាយអី សូមតម្កល់ទ្រង់ជាព្រះមហាក្សត្រ នៃជាតិខ្មែរយើង ជានិមិត្តរូបឯកភាពជាតិ និងនិរន្តរភាពជាតិ»។
ការអំពាវនាវរបស់ប្រមុខថ្នាក់ដឹកនាំគណបក្សយុវជនរូបនេះ ក្រោយពីមានបុគ្គលមួយចំនួនដែលជាក្រុមប្រឆាំងបានព្យាយាមសរសេរសារលើបណ្ដាញសង្គមហ្វេសប៊ុក ធ្វើឱ្យប៉ះពាល់ដល់អង្គព្រះមហាក្សត្រ ដោយពួកគេបានយកព្រះឆាយាល័ក្ខ័ និងសរសេរភ្ជាប់សារដោយមិនគួរគប្បីមួយចំនួន។ ប៉ុន្តែ បុគ្គលមួយចំនួនទាំងនោះ ត្រូវបានសមត្ថកិច្ចចាប់ខ្លួនហើយ បន្ទាប់ពីសម្ដេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា បានប្រតិកម្មចំពោះសារលើបណ្ដាញសង្គមដែលពួកគេបានសរសេរ។
សូមជម្រាបថា អតីតសកម្មជនក្រុមប្រឆាំងពីររូប គឺលោក យឹម ស៊ីណន និង លោក ហ៊ុន កុសល ត្រូវបានសមត្ថកិច្ចចាប់ខ្លួន នៅល្ងាចថ្ងៃទី២១ ខែមីនា ឆ្នាំ២០២៣នេះ ក្រោយបុគ្គលទាំងពីរបានបង្ហោះសារបែបញុះញង់តាមបណ្តាញសង្គមពាក់ព័ន្ធហ្វេសប៊ុកភ្ជាប់ជាមួយព្រះឆាយាល័ក្ខណ៍ព្រះមហាក្សត្រព្រះរាជទានព្រះអគ្គីជ័យកីឡាសម្រាប់ព្រឹត្តិការណ៍ប្រកួតកីឡាអាស៊ីអាគ្នេយ៍លើកទី៣២ និងអាស៊ានប៉ារ៉ាហ្គេមលើកទី១២ ឆ្នាំ២០២៣ នៅខេត្តសៀមរាប នាថ្ងៃទី២១ ខែមីនានេះ។ នេះបើយោងតាមការបញ្ជាក់របស់មន្ត្រីជាន់ខ្ពស់របស់អគ្គស្នងការដ្ឋាននគរបាលជាតិ ថ្លែងប្រាប់បណ្ដាញសារព័ត៌មានហ្វ្រេសញូវ៕
អត្ថបទ៖ ព្រួញទេព
