ចាប់ខ្លួនជនសង្ស័យប្រើប្រាស់ថ្នាំញៀនដែលគប់កញ្ចក់រថយន្តពលរដ្ឋ២គ្រឿងនៅស្រុកបាទី

(ខេត្តតាកែវ)៖ កម្លាំងនគរបាលស្រុកបាទី នៅព្រឹកថ្ងៃទី២១ ខែមីនា ឆ្នាំ២០២៣ បានឃាត់ខ្លួនជនសង្ស័យម្នាក់ ក្រោយធ្វើសកម្មភាពគប់កញ្ចក់ឡានពលរដ្ឋចំនួនពីរគ្រឿង កាលពីយប់ថ្ងៃទី២០ ខែមីនា ឆ្នាំ២០២៣។

ជនសង្ស័យនេះឈ្មោះ សូត្រ ចន្ថា ភេទប្រុស អាយុ៣១ឆ្នាំ មុខរបរមិនពិតប្រាកដ ជាមុខសញ្ញាប្រើប្រាស់គ្រឿងញៀន មានទីលំនៅភូមិត្រពាំងឬស្សី ឃុំសូរភី ស្រុកបាទី ខេត្តតាកែវ ដែលបានធ្វើសកម្មភាពយកដុំថ្មគប់ទៅលើរថយន្តចំនួនពីរគ្រឿង។ រថយន្តទាំងពីរគ្រឿងនោះ រួមមាន៖ រថយន្តម៉ាកតូយ៉ូតា រ៉ាស់ សេរីឆ្នាំ២០២១ ពណ៌សពាក់ផ្លាកលេខ ភ្នំពេញ 2BK-4277មួយគ្រឿងរបស់ជនរងគ្រោះឈ្មោះ យ៉ែម នាង ភេទប្រុស អាយុ៤៨ឆ្នាំ មានទីលំនៅភូមិបាំងណា ឃុំជង្រុក ស្រុកគងពិសី ខេត្តកំពង់ស្ពឺ បណ្តាលឱ្យបែកកញ្ចក់ខាងមុខចំនួន២កន្លែង។ រីឯរថយន្តមួយគ្រឿងទៀតម៉ាកតូយ៉ូតាតាកូម៉ាសេរីឆ្នាំ១៩៩៦ ពណ៌សំបកឪឡឹក ពាក់ផ្លាកលេខ ច៩៨៤១ភព២ របស់ជនរងគ្រោះឈ្មោះ (ប៉េង ណាន) ភេទស្រី អាយុ២៨ឆ្នាំ មានទីលំនៅភូមិខ្លែងគង់ ឃុំកំពង់រាប ស្រុកព្រៃកប្បាស ខេត្តតាកែវ បែកកញ្ចក់ទ្វារខាងមុខចំហៀងខាងឆ្វេង បម្រុងនិងលូកដៃយកទូរស័ព្ទដែលនៅក្នុងរថយន្ត តែត្រូវបានប្រជាការពារប្រទះឃើញក៏ស្រែកឆោរឡោ ហើយពេលនោះជនសង្ស័យក៏បានរត់គេចខ្លូនបាត់ ។

ចំពោះមូលហេតុ ដែលធ្វើឱ្យជនបង្កឈានដល់យកដុំថ្មគប់កញ្ចក់រថយន្តនេះ គឺដោយសារជនសង្ស័យប្រើប្រាស់គ្រឿងញៀន ហើយបច្ចុប្បន្នជនសង្ស័យ ត្រូវបានកម្លាំងការិយាល័យជំនាញកសាងសំណុំបញ្ជូនទៅចាត់ការបន្តតាមនីតិវិធី៕