សមត្ថកិច្ចចាប់ខ្លួនជនសង្ស័យម្នាក់ និងរឹបអូសគ្រឿងញៀនជាង៥គីឡូក្រាម
កម្លាំងសមត្ថកិច្ចជំនាញ(ក១១)របស់មន្ទីរប្រឆាំងបទល្មើសគ្រឿងញៀន នៅថ្ងៃទី០៣ ខែមករា ឆ្នាំ២០២៣ វេលាម៉ោង១៩៖៣០នាទី បានសហការជាមួយកម្លាំងជំនាញនៃស្នងការដ្ឋាននគរបាលរាជធានីភ្នំពេញព្រម បានបើកការស៊ើបអង្កេតស្រាវជ្រាវ និងបង្ក្រាបករណីគ្រឿងញៀនមួយករណី នៅចំណុចផ្ទះជួលលេខ អេ៤៨ ផ្លូវលេខ៦ ភូមិត្រពាំងមាន សង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ។
ប្រតិបត្តិការណ៍នេះ សមត្ថកិច្ចបានឃាត់ខ្លួនជនសង្ស័យ១នាក់ ឈ្មោះចាន់ រ៉ា ភេទប្រុស អាយុ៣៦ឆ្នាំ ជនជាតិខ្មែរ។ ចំពោះវត្ថុតាងសមត្ថកិច្ចចាប់យកបានថ្នាំញៀនប្រភេទមេតំហ្វេតាមីន(ICE) ទម្ងន់ជាង៥គីឡូក្រាម(៥គីឡូក្រាមនិង២០៧ក្រាម)។
បច្ចុប្បន្ន ជនសង្ស័យ និងវត្ថុតាងដែលរឹបអូសបាន សមត្ថកិច្ចជំនាញបានកសាងសំណុំរឿង បញ្ជូនជូនទៅសាលាដំបូងរាជធានីភ្នំពេញបន្តតាមនីតិវិធី៕
