ចំនួនអ្នកស្លា-.ប់ដោយព្យុះព្រិលនៅញ៉ូយ៉ក កើនដល់ ២៧ នាក់ហើយ
ចំនួនករណីស្លាប់ដោយព្យុះព្រិលនារដ្ឋ ញ៉ូយ៉ក បានកើនឡើងដល់ ២៧ នាក់ហើយ ក្រោយអាជ្ញាធរ ប្រកាសមានអ្នកស្លាប់ ១៤ នាក់នៅក្រុង Buffalo ក្នុងពេលមួយថ្ងៃ។
ក្រុង Buffalo ទីក្រុងធំបំផុតទី ២ នៅរដ្ឋ ញ៉ូយ៉ក គឺជាតំបន់មួយដែលរងផលប៉ះពាល់ដោយព្យុះព្រិលធ្ងន់ធ្ងរជាងគេបំផុត។ ជាក់ស្ដែងកាលពីថ្ងៃទី ២៦ ខែធ្នូ ឆ្នាំ ២០២២ កន្លងទៅ មន្ត្រីក្នុងតំបន់ បានប្រកាសថា ចំនួនអ្នកស្លាប់ដោយគ្រោះធម្មជាតិមួយនេះ កើនឡើងដល់ ២៧ នាក់ហើយ។ ភាគច្រើននៃជនរងគ្រោះទាំងនោះ គឺបានស្លាប់អំឡុងពេលជាប់គាំងនៅក្នុងឡាន ឬ មានបញ្ហាបេះដូង ខណៈពេលកំពុងកាយព្រិល។
ព្យុះព្រិលនេះដែរ គឺជាព្យុះព្រិលដ៏អាក្រក់បំផុត គិតតាំងពីបាតុភូតធម្មជាតិនៅក្រុង Buffalo កាលពីឆ្នាំ ១៩៧៧ ដែលសម្លាប់មនុស្សជិត ៣០ នាក់ នេះបើតាមការបញ្ជាក់របស់រដ្ឋាភិបាលរដ្ឋ ញ៉ូយ៉ក។ ជាមួយគ្នានោះដែរ រដ្ឋញ៉ូយ៉ក ក៏បានដាក់ពង្រាយសន្តិសុខជាតិ ដើម្បីជួយអាជ្ញាធរក្នុងតំបន់ ក្នុងការជួយសង្គ្រោះពលរដ្ឋដែលជាប់គាំងក្នុងរថយន្ត និង នៅតាមតំបន់ដែលគ្មានអគ្គិសនីប្រើប្រាស់ ថែមទាំងជួយពិនិត្យសុខភាព និង ផ្ដល់ជាជំនួយស្បៀងដល់អ្នកដែលត្រូវការផងដែរ៕
