តុលាការប្រកាសសាលក្រមកាត់ទោសសកម្មជន និងថ្នាក់ដឹកនាំអតីតបក្សប្រឆាំងជិត៤០នាក់ឱ្យជាប់ពន្ធនាគារពី៥ទៅ៧ឆ្នាំ
(រាជធានីភ្នំពេញ)៖ សាលាដំបូងរាជធានីភ្នំពេញ នៅថ្ងៃទី២២ ខែធ្នូ ឆ្នាំ២០២២ម្សិលមិញ បានប្រកាសសាលក្រមផ្ដន្ទាទោសលើអតីតសកម្មជន និងសកម្មជនគណបក្សសង្គ្រោះជាតិសរុប៣៦នាក់ ក្នុងចំណោម៣៧នាក់ឱ្យជាប់ពន្ធនាគារចន្លោះពី៥ទៅ៧ឆ្នាំ ពាក់ព័ន្ធនឹងសំណុំរឿងរួមគំនិតក្បត់ ទាក់ទងនឹងដំណើរមាតុភូមិនិវត្តន៍របស់ លោកស្រីមូរ សុខហួរ អនុប្រធានអតីតគណបក្សសង្គ្រោះជាតិ កាលពីចុងឆ្នាំ២០២០។ ជាមួយគ្នា ពួកគេក៏ត្រូវដកហូតសិទ្ធិបោះឆ្នោត និងសិទ្ធិឈរឈ្មោះបោះឆ្នោតផងដែរ។
លោកស្រីអ៊ុក រ៉េតគន្ធា ប្រធានក្រុមប្រឹក្សាជំនុំជម្រះសាលាដំបូងរាជធានីភ្នំពេញ នៅថ្ងៃទី២២ធ្នូ បានប្រកាសសាលក្រមផ្ដន្ទាទោសមេដឹកនាំរបស់អតីតបក្សប្រឆាំងចំនួន១១នាក់ រួមមាន លោកសម រង្ស៊ី លោកអេង ឆៃអ៊ាង លោកឡុង រី លោកស្រីមូរ សុខហួរ លោកហូរ វ៉ាន់ លោកស្រីជូ ឡុងសូម៉ូរ៉ា លោកនុត រំដួល លោកអ៊ូ ច័ន្ទរិទ្ធ និងមនុស្សចំនួន៣នាក់ទៀតដាក់ពន្ធនាគារក្នុងម្នាក់ៗ៧ឆ្នាំ ព្រមទាំងត្រូវដកសិទ្ធិបោះឆ្នោត និងឈរឈ្មោះបោះឆ្នោត។
រីឯសកម្មជនអតីតបក្សប្រឆាំង២៥នាក់ផ្សេងទៀត ត្រូវផ្ដន្ទាទោសដាក់ពន្ធនាគារក្នុងម្នាក់ៗ៥ឆ្នាំ ដោយក្នុងនោះ មាន៣នាក់កំពុងជាប់ឃុំនៅពន្ធនាគារព្រៃស រួមមាន លោកគង់ ម៉ាស់ លោកវឿង សំណាង និងលោកខាន់ ប៊ុនផេង។ ចំណែកឯឈ្មោះឈុន វុទ្ធី និងឈ្មោះងឹម ញ៉េញ ត្រូវផ្ដន្ទាទោស៥ឆ្នាំដែលតុលាការកាត់ទោសឱ្យព្យួរទោសពីរនាក់។
ដោយឡែក ឈ្មោះសេង សុខឡេង វិញ ត្រូវតុលាការសម្រេចឱ្យអនុវត្តទោសក្នុងពន្ធនាគារប្រហែល ១ខែ ខណៈទោសដែលនៅសេសសល់ត្រូវព្យួរទាំងអស់ដែរ ហើយឈ្មោះម៉ាត់ វណ្ណី ត្រូវបានតុលាការសម្រេចឱ្យរួចផុតពីបទចោទប្រកាន់។
ជាមួយគ្នា ប្រធានក្រុមប្រឹក្សាជំនុំជម្រះសាលាដំបូងរាជធានីភ្នំពេញ ក៏បានប្រកាសចេញដីកាឱ្យចាប់ខ្លួនមនុស្សចំនួន២០នាក់ និងបង្គាប់ឱ្យបញ្ឈប់ការចេញដីកាចាប់ខ្លួនមនុស្ស៣នាក់ផងដែរ គឺទី១.ឈ្មោះ ម៉ាត់ វណ្ណី ទី២.ឈ្មោះឈុន សិទ្ធី និងទី៣.ឈ្មោះងឹម ញ៉េញ។
កាលពីថ្ងៃទី០១ ខែធ្នូ ឆ្នាំ២០២០ អតីតមេដឹកនាំបក្សប្រឆាំង លោក សម រង្ស៊ី បានចេញសេចក្តីប្រកាសព័ត៌មានថា អនុប្រធានអតីតគណបក្សសង្គ្រោះជាតិ អ្នកស្រី មូរ សុខហួរ នឹងធ្វើមាតុភូមិនិវត្តន៍នៅថ្ងៃទី០៤ ខែមករា ឆ្នាំ២០២១ ដោយមានការចូលរួមពីសកម្មជនរបស់ខ្លួនផងដែរ ប៉ុន្តែសកម្មភាពគាំទ្រមាតុភូមិនិវត្តន៍របស់សកម្មជនទាំងនោះ ត្រូវបានតុលាការចោទប្រកាន់ពីបទ រួមគំនិតក្បត់ ដោយផ្អែកលើការបង្ហោះសារនៅលើហ្វេសប៊ុក និងការថតសំឡេងសន្ទនាតាមទូរស័ព្ទជាលក្ខណៈឯកជនរបស់ពួកគេ ជាដើម។
នៅក្រោយចប់សវនាការ ក្រុមគ្រួសាររបស់លោកខាន់ ប៊ុនផេង លោកគង់ ម៉ាស់ និងលោកវឿង សំណាង ដែលត្រូវតុលាការកាត់ទោសឱ្យជាប់ពន្ធនាគាររយៈពេល៥ឆ្នាំដោយគ្មានការព្យួរទោស បានស្រែកយំនៅមុខសាលាដំបូងរាជធានីភ្នំពេញ។ ពួកគេបានអះអាងថា ការប្រកាសសាលក្រមរបស់តុលាការនេះធ្វើឡើងយ៉ាងអយុត្តិធម៌ ព្រោះប្តីរបស់ពួកគេមិនបានប្រព្រឹត្តដូចការចោទប្រកាន់នោះទេ។ មិនតែប៉ុណ្ណោះ ពួកគេថាគ្មានជំនឿដើម្បីប្តឹងឧទ្ធរណ៍បន្តទៀតនោះទេ។
ទាក់ទងនឹងសាលក្រមដ៏ធំនេះ លោកអំ សំអាត នាយករងទទួលបន្ទុកកម្មវិធីឃ្លាំមើលសិទ្ធិមនុស្សនៃអង្គការលីកាដូ លើកឡើងថា សាលក្រមកាត់ទោសសកម្មជន និងមេដឹកនាំអតីតបក្សប្រឆាំងទាំងនេះ គឺអង្គការសង្គមស៊ីវិលនៅក្នុងស្រុក ក៏ដូចជាអង្គការ ឬសហគមន៍អន្តរជាតិយល់ថា សាលក្រមនេះទាក់ទងនឹងរឿងនយោបាយជាជាងការអនុវត្តច្បាប់។
ចាប់តាំងពីអំឡុងខែវិច្ឆិកា ឆ្នាំ២០២០មក អតីតសកម្មជន និងថ្នាក់ដឹកនាំគណបក្សសង្គ្រោះជាតិចំនួន១៥៨នាក់ហើយ ត្រូវរងបទចោទចំនួនពីរផ្សេងគ្នា ដោយក្នុងចំណោមពួកគេ ខ្លះត្រូវបានចោទពីបទញុះញង់បង្កឱ្យមានភាពវឹកវរដល់សន្តិសុខសង្គម បទរួមគំនិតក្បត់ និងបទប៉ុនប៉ងធ្វើឧបឃាត ឬផ្តួលរំលំរដ្ឋាភិបាលកម្ពុជា៕
