ធនាគារពិភពលោក៖ កូវីដ-១៩បានរុញរំកិលឱ្យអត្រាភាពក្រីក្រនៅកម្ពុជាកើនឡើងវិញក្រោយធ្លាក់ចុះអស់ប្រមាណ១ទសវត្សរ៍
របាយការណ៍ធនាគារពិភពលោកចេញផ្សាយ នៅថ្ងៃទី២៨ ខែវិច្ឆិកា ឆ្នាំ២០២២ បានបង្ហាញថា រយៈពេលមួយទសវត្សរ៍ រាប់ចាប់ពីឆ្នាំ២០០៩ដល់ឆ្នាំ២០១៩ អត្រាភាពក្រីក្រនៅកម្ពុជាបានធ្លាក់ចុះស្ទើរពាក់កណ្តាល ប៉ុន្តែដោយសារតែវិបត្តិជំងឺកូវីដ-១៩ បានធ្វើឱ្យអត្រាភាពក្រីក្រកើនឡើងវិញនាពេលថ្មីៗនេះ។
របាយការណ៍វាយតម្លៃភាពក្រីក្រដែលចេញផ្សាយដោយធនាគារពិភពលោកមានចំណងជើងថា “ស្តារសេដ្ឋកិច្ចកម្ពុជាឱ្យកាន់តែមានភាពបរិយាប័ន្ន និងភាពធន់ជាងមុន” (Toward A More Inclusive and Resilient Cambodia)បានឱ្យដឹងថា ក្នុងរយៈពេល១០ឆ្នាំចុងក្រោយ គិតមកដល់ឆ្នាំ២០១៩-២០២០ អត្រាភាពក្រីក្ររបស់កម្ពុជាបានធ្លាក់ចុះពីកម្រិត៣៣,៨ភាគរយ មកនៅត្រឹម១៧,៨ភាគរយ ដោយជួយឱ្យប្រជាជនកម្ពុជាជិត២លាននាក់បានរួចផុតពីបន្ទាត់ក្រីក្រ ប៉ុន្តែចាប់តាំងពីឆ្នាំ២០២០មក អត្រាភាពក្រីក្របានកើនឡើង២,៨ភាគរយ ពោលគឺប្រជាជនប្រមាណ៤៦ម៉ឺននាក់បានធ្លាក់ទៅក្រោមបន្ទាត់ក្រីក្រវិញ។
ធនាគារពិភពលោកកត់សម្គាល់ថា ពីឆ្នាំ២០០៩ដល់ឆ្នាំ២០១៩ ជាអំឡុងពេលដែលកម្ពុជាមានកំណើនសេដ្ឋកិច្ចឥតឈប់ឈរ និងការកើនឡើងនៃប្រាក់ចំណូលយ៉ាងទូលំទូលាយ។ ជាពិសេសកម្ពុជាបានពង្រីកវិស័យសេដ្ឋកិច្ចយ៉ាងឆាប់រហ័ស រួមផ្សំជាមួយនឹងការផ្លាស់ប្តូររចនាសម្ព័ន្ធ ដែលនាំឱ្យមានការកើនឡើងប្រាក់ឈ្នួល និងកម្រិតជីវភាពប្រជាពលរដ្ឋរស់នៅកាន់តែប្រសើរ។
របាយការណ៍របស់ធនាគារពិភពលោកដដែលបានរកឃើញថា ការកើនឡើងនូវប្រាក់ចំណូលមិនមែនកសិកម្ម មានដូចជា នៅក្នុងវិស័យទេសចរណ៍ កាត់ដេរ និងសំណង់ មានចំណែកធំក្នុងការកាត់បន្ថយភាពក្រីក្រ។ កំណើនដែលនាំមុខដោយពាណិជ្ជកម្ម និងការវិនិយោគ បានជួយទ្រទ្រង់ដល់ការផ្លាស់ប្តូរជារចនាសម្ព័ន្ធឆ្ពោះទៅរកវិស័យមានផលិតភាពកាន់តែខ្ពស់ ជួយបង្កើតការងារដែលមានប្រាក់ខែកាន់តែប្រសើរនៅក្នុងផ្នែកផលិតកម្មនិងផ្នែកសេវាកម្ម។ ចំណែកឯកម្មករមានលទ្ធភាពផ្លាស់មុខរបរពីវិស័យកសិកម្មដែលមានប្រាក់កម្រៃទាប ទៅធ្វើការនៅតាមវិស័យដែលមានប្រាក់កម្រៃខ្ពស់ជាង និងជួយបង្កើនប្រាក់ចំណូលរបស់កម្មករ។
លក្ខខណ្ឌជីវភាពនិងលទ្ធភាពទទួលបានសេវាមូលដ្ឋាន មានដូចជា អគ្គិសនី ការផ្គត់ផ្គង់ទឹកស្អាត អនាម័យ សុខភាព និងការអប់រំជាដើម ក៏មានភាពប្រសើរឡើងមួយភាគធំនៅក្នុងចំណោមប្រជាជនសរុប។ ប្រការនេះបានកាត់បន្ថយគម្លាតជីវភាពរវាងប្រជាពលរដ្ឋជនបទ និងប្រជាពលរដ្ឋនៅទីប្រជុំជនឱ្យរួមតូចជាងមុន។
លោកស្រី ម៉ារីយ៉ាម សាលីម ប្រធានគ្រប់គ្រងការិយាល័យធនាគារពិភពលោកប្រចាំនៅកម្ពុជាបានឱ្យដឹងថា កិច្ចខិតខំជំរុញឱ្យមានការផ្លាស់ប្តូរជារចនាសម្ព័ន្ធបានជួយកាត់បន្ថយភាពក្រីក្រក្នុងរយៈពេលកន្លងមក។ ប៉ុន្តែ ទន្ទឹមនឹងជោគជ័យគួរឱ្យកត់សម្គាល់នេះ គ្រួសារជាច្រើនស្ថិតនៅក្នុងស្ថានភាពងាយរងគ្រោះនៅឡើយ ដោយសារពួកគេមិនសូវមានប្រាក់សន្សំ ឬការគាំពារសង្គម។ លោកស្រីសង្កត់ធ្ងន់ថា ជំងឺកូវីដ-១៩ បានបន្ទុចបង្អាក់ដល់ការប្រយុទ្ធនឹងភាពក្រីក្រ ហើយធ្វើឱ្យប្រជាជនជាច្រើនបាត់បង់ការងារនិងប្រាក់កម្រៃ។
របាយការណ៍វាយតម្លៃភាពក្រីក្រដដែលនេះ បានផ្ដល់ជាអនុសាសន៍ឱ្យ រដ្ឋាភិបាលកម្ពុជាគួរពិចារណាលើអន្តរាគមន៍ផ្នែកគោលនយោបាយមួយចំនួន ដើម្បីគាំទ្រដល់ការស្តារសេដ្ឋកិច្ចឡើងវិញប្រកបដោយបរិយាប័ន្ននិងភាពធន់ជាងមុនពីការប៉ះទង្គិចរបស់ជំងឺរាតត្បាត និងវិបត្តិសេដ្ឋកិច្ច។ ការអន្តរាគមន៍ទាំងនោះ រួមមានដូចជា ការឧបត្ថម្ភសាច់ប្រាក់ជូនប្រជាពលរដ្ឋងាយរងគ្រោះ ពង្រឹងកិច្ចគាំពារសង្គម និងការគាំទ្រលើវិស័យសុខាភិបាល និងការអប់រំជាដើម៕
