ដើមឈើគ្រញូង៤ដើម នៅខេត្តសៀមរាប ដែលមានអាយុកាលប្រមាណ៥០ឆ្នាំ ត្រូវបានគេលួចកាប់
សៀមរាប៖ នាពេលថ្មីៗកន្លងមកនេះ មានជនខិលខូចមិនស្គាល់អត្តសញ្ញាណ បានចូលលួចកាប់ដើមឈើពូជប្រភេទគ្រញូងចំនួន ៤ដើម ដែលមានអាយុកាលប្រមាណ ៥០ឆ្នាំមកហើយ។ នេះបេីយោងតាមការឱ្យដឹងពី មន្ទីរកសិកម្ម រុក្ខាប្រមាញ់ និងនេសាទ ខេត្តសៀមរាប នៅថ្ងៃទី១៧ ខែមិថុនា ឆ្នាំ២០២២។
មន្ទីរកសិកម្ម បានចាត់ទុកការកាប់ដើមគ្រញូងនេះ ជាបទល្មើសឧក្រិដ្ឋបង្កការបាត់បង់ទ្រព្យសម្បត្តិសាធារណៈរបស់រដ្ឋដ៏មានតម្លៃ នៅក្នុងចម្ការពូជឈើគ្រញូងដែលមានទំហំ ១.៨៨០ហិកតា ស្ថិតនៅភូមិសាស្ត្រ ឃុំកន្ទួត ស្រុកស្វាយលើ និងឃុំឃុនរាម ស្រុកបន្ទាយស្រី ខេត្តសៀមរាប។
តំបន់នេះ ត្រូវបានគ្រប់គ្រង និងអភិវឌ្ឍតាំងពីឆ្នាំ២០០១ ក្នុងគោលបំណងថែរក្សាជីវចម្រុះ អភិរក្សធនធានសេនេទិចព្រៃឈើ តំបន់លំហែកម្សាន្ត និងសម្រាប់ស្រាវជ្រាវវិទ្យា សាស្ត្រ។ តំបន់នេះមានសក្តានុពលធនធានព្រៃឈើដ៏មានតម្លៃ ហើយក្រសួងកសិកម្ម រុក្ខាប្រមាញ់ និងនេសាទ បាន ចេញប្រកាសលេខ៦០២ ប្រក.កសកទទួលស្គាល់ ជាតំបន់ស្តារ និងអភិវឌ្ឍន៍ព្រៃឈើ ចុះថ្ងៃទី២៣ ខែកញ្ញា ឆ្នាំ២០១៦។
មន្ទីរកសិកម្ម រុក្ខាប្រមាញ់ និងនេសាទ អំពាវនាវដ៏ទទូចចំពោះសាធារណៈជនដែលបានស្គាល់ ដឹង ដំណឹងពាក់ព័ន្ធនិងជនល្មើស ហើយបានរាយការណ៍ និងផ្តល់ព័ត៌មានដល់សមត្ថកិច្ច រហូតឈានទៅចាប់ជនល្មើសបាន មន្ទីរកសិកម្ម រុក្ខាប្រមាញ់ និងនេសាទ ខេត្តសៀមរាប នឹជូនរង្វាន់ជាប្រាក់ចំនួន ១.០០០ដុល្លារ ហើយព័ត៌មានត្រូវបានរក្សាជាការសម្ងាត់ជូនមិនឱ្យមានបញ្ហាដល់អ្នកផ្តល់ព័ត៌មានខាងលើនេះ ឡើយ។ ចំពោះលេខទូរស័ព្ទ ០៩២ ២២.៥៥ ៥៥ និង ០៩៧ ៦៦ ៦៦ ៨៤៤៕
